Kumin March-April chhunga ruahsur leh thlipuiin Mizoram hmun hrang hranga chhiatrupna a thlen avanga sorkar laipuia chhawmdawlna tur dil mek ngaihtuah tur leh a hmuna chhiatna thleng enfiah turin vawiin khan New Delhi atangin Inter-Ministerial Team te chu Aizawl an rawn thleng.

Vawiin chawhnu khan State Guest House-ah Disaster Management & Rehabilitation Secretary Pu Rohmingliana kaihhruaina hnuaiah meeting neih nghalin Inter-Ministerial Team te hnenah Mizoram district hrang hranga chhiatna thlen dan entir a ni a, a kaihhnawih Ministry aiawha lo kal ten chhiatna thlen dan chiang takin Mizoram sorkar officials te an zawt bawk. Ruahsur leh thlipuiin chhungkua 3999  te chu In nei lovin a siam a, In dinglai 10127 a tluchhia a, mitthi 4 leh  hliam na tak tuar mi 11 an awm a ni. Heng bakah sorkar building engemawzat a chhe bawk a, buh leh thlai tam takin a tawrh bawk thu Inter-Ministerial Team te hnenah hrilhfiah a ni.

Mizoram sorkar chuan heng chhiatna thlenna hmun te hi khawchhiat apiangin a tuartu an nih zel avangin an awmna tur In tha deuh sak sak a rawt a. Hetiang Housing Colony sak nan sorkar laipuiah Rs.2,88,970/- an dil chu vawiin khan Inter-Ministerial Team te hnenah an thlen leh a ni. Chhiatrupna thlen vanga nunna chan te hnenah chhawmdawlna cheng nuai 1 pek leh hliam tuar te hnenah cheng 76,000/- pek rawt a ni bawk.

Inter-Ministerial Team hi Pu Lokesh Jha, Jt. Secretary, Ministry of Home Affairs-in a rawn hova; Team member te chu :- Pu A.K.Sood, Director, Ministry of Rural Development; Dr.Ramanand, Sr. Research Officer, Planning Commission; Pu Y.C. Sharma, Jt. Director, Ministry of Finance leh Dr. S.K.Biswas te an ni. An Team hian naktuk zingah feh chhuakin Bukpui, Thingsulthliah leh Tlungvel te an tlawh ang a, Mizoram sorkar officials engemawzatin an tawiawm dawn a ni.