Vawiin khan Aizawl DC Dr. Franklin Laltinkhuma, IAS hovin a Pisa ah International Anti Corruption Day 2012 puala Aizawl District huam chhunga hlemhlet do chungchanga inelna hrang hrang buatsaih dan tur an sawi ho. Meeting thurel tlangpui chu hetiang hi a ni.

Pawl 9 atanga Pawl 12 zirlaite tan Mizo tawngin ‘Hlemhletna in khawtlang nun a nghawng dan’ tih leh Sap tawngin ‘Corruption and its impact on society’ tih thupui hmang ten essay a inelna buatsaih a ni dawn a. He inelna buatsaih tur hian DEO (Aizawl) chu mawhphurna pek a ni a. College zirlai te tan Mizo tawng leh sap tawnga debate inelna chu I & PR Auditorium-ah December ni 6 khian Higher & Technical Education Department chuan an buatsaih ang a. Chanchinbu editor te leh chanchinbu mite te tan December ni 3 - 7 inkarah Mizo leh Sap chanchinbu chhuaka editorial/article ziak thate thlanchhuah a ni dawn a, a tha pathum thlang chhuak turin I & PR Department chu mawhphurna pek an ni bawk.

International Anti Corruption Day 2012 puala State Level Function December ni 10 Mizoram Legislative Conference Hall-ah nei turah khian heng inelnaa ti tha te chu lawmman hlan an ni dawn a. He function ah hian Mizoram Larsap chu khuallian leh Chief Minister chu khualzahawm ni tura beisei an ni.