Mizoram District hrang hrangah International Anti Corruption Day Vawiin khan a hmasa ber atan hman a ni.a, a hmanna pui ber Aizawl-ah chuan Legislative Assembly Annexe Conference Hall ah hman a niin, Mizorama Larsap Pu Vakkom B. Purushothaman chu khuallian a ni a, Chief Minister Pu Lal Thanhawla chu khualzahawm a ni.

Khuallian Pu Vakkom B. Purushothaman chuan Internatioanal Anti Corruption Day hi mitinin kan mawhphurna theuh hriatthar ni ah hmang ila, a ti a. Hlemhletna hian ram hmasawnna leh chakna. ti thuanawp thei tu anih theih avangin khawvelin a dona hi a ngaipawimawh hle a ni , a ti a.Mizoramah mawhphurna la ngam leh langtlang sawrkar a awm theih na tura hetiang programme Anti Corruption Bureau leh Vigiliance Department in an buatsaih hi a lawmawm hle a ni, a ti.

Khuallian chuan hlemhletna umbo anih theihna tura nasa taka hmalatu Chief Minister chungah leh a thawhpuite chungah lawmthu sawiin, an lakah hlemhletna sawitur a awmlo hi a ropui hle a ni, a ti a. Vawiina hlemhletna dona ni ah tlawmngai pawlte leh zirlai naupang ten phur taka ian telna, essay leh debate intihsiaknaah te an tal chu a lawmawm a, mitinin he ni denchhan hian kan dikna leh chanvo hria a mawhphurhna kan neihte hre thar leh turin a sawm a ni.

Khualzahawm Chief Minister Pu Lal Thanhawla chuan khawvel ramdangte ruala hlemhletna dona ni kan hmang hi a lawmawm hle a ni, a ti a. Corruption han tih hian sawrkar sum eirukna chauh hi kan hre hle a, mahse sawrkar sum eirukna piahlamah mahni hna a tuilohna te, thawh that peihlohnate, zawmthawtnate, inthlahdahna te, thatchhiatna te, kuttlinglova sum lak duhna te leh tlemte thawh a tamtak lak tumnate a huam vek a ni a ti. Hlemhletna zungkaihna hi Eden huan atanga intan a ni a ti a, sawrkar chuan theihtawp chhuahin a zung phawia phoro turin nasa takin hma a la a, chuvangin ram thanmawhbawk, corruption hi a zung phawia phoro turin kan tan tlan a ngai a ni a ti. Tlawmngai pawl thenkhat ten do ngama hma an la hi a lawmawmin a thlamuanthlak a, kan zavaia a chhelai siamtha turin kan tan tlan a ngai a ni a ti. Insawipui hnam ni lova dikna lal tir ngamtu theuh kan nih a pawimawh a. Langtlang sawrkar a awm theihna turin ACB website thar hmang tangkai a, RTI te a tam thei ang bera mipui ten an hman a tul a ni, a ti.

Chief Minister hian ACB Manual buatsaih thar a tlangzarh bakah website thar www.acbmizoram.gov.in a hawng bawk a ni.

Khuallian, Governor chuan ACB a thawkten phur taka an hna an thawhna tura hna thawhthat man, lawmman siam chu a hmasa ber atan Iinvestigating Officer thabera thlan Pu C. Vanramlawma, Dy. SP hnenah leh Asst. Investigating Officer thaber Pu B. Lalhlimpuia, ASI hnenah certificate leh Rs, 5000/- ve ve a hlan a. Aizawl District chhunga school naupang tana essay inziahsiakna leh College zirlai ten debate a intihsiakna a tel lawmman ti tha zualte hnenah lawmman a sem bawk a ni.

Chief Secretary & Chief Vigilance Officer Pi L. Tochhawng chuan sawrkar thil tum pawimawh ber pakhat chu hlemhletna do a ni a ti a. Tunah hian Chief Minister Pu Lal Thanhawla hmalakna in ACB chu tilianin an awmna tur ram leh building sak nan Rs. 4.5 crore sanction tawh a ni a ti a. A hnathawktu te pawh CBI enkawlna hnuaiah training te pek an ni tiin, prosecutor 2 dah remtih anih tawh thu a sawi bawk a. ACB a thawk tur te hi deputation a dah vek an nih thu a sawi bawk.

Hlemhletna dona ni inkhawm hi Pu Kunal, IAS, SpecialSecretary, Vigilance in a kaihhruai a. Inkhawmah hian Minister, Dy Speaker, Parliamentary Secretary, MLA leh Senior officer te an tel a ni.