Vawiin hi International Biological Diversity Day a ni a, he Ni puala programme chu Mizoramah pawh hman a ni a, Mizoram State Diversity Board leh Environment, Forests & Climate Change Department te tangkawpin he hun hmanna programme hi Conference Hall, Assembly Annexe Building ah an buatsaih a. Assembly Deputy Speaker Pu R. Lalrinmawia, MLA thenkhat te leh Deapartment hrang hrang aiawhten programme hi an hmanpui a. Chief Minister Pu Lal Thanhawla khuallian tura beisei chu dam damlohna avanga a tel theih loh avangin he Ni puala a thuchah chu Principal Secretary to Chief Minister leh programme kaihruaitu Pu Laram Thanga’n a chhairchhuak a ni. Kumin International Biodiversity Day thupui atan ‘ Biodiversity and Sustainable Tourism’ hman a ni.
Chief Minister thuchah ah hian mihring pung chho zelin mamawhna hrang hrang a tih pun thu te, chu chuan hmasawnna kalpui lamah ramngaw a tihchereu thu te, dimdawia nungcha leh ramngaw enkawl a pawimawh leh a tul thu te tarlan a ni a. Mizoram chu zirmiten nungcha hausakna neihna hmun ‘biodiversity hotspots’ ah an ngaih thu te, heng rohlu, ramngaw mawi tak te, lui dung leh nungchate leh nunna nei dang chitin reng te duatin humhalh chuan ram thil neih (asset) hlu leh tlo berah a chhuah theih thu te leh ramngaw leh a chhunga cheng nungcha te hi khualzin hip theihna hmanraw tha tak a nih theih thu te a thuchhahah hian tarlan a ni bawk.
Assembly Speaker Pu R. Lalrinawma’n Mizoram University in nungcha hrang hrang hausak dan leh a chhinchhiahna bu an siam People’s Biodiversity Register a tlangzarh a. Nungcha te humhalh a, thing leh mau te tichereu lova, ram tichhe loin tourism kaltir chu tunlai khawvel abik takin Mizoram ang tlang ramah a pawimawh leh a tul thu a sawi a. Nungcha te hi ram hausakna a nih avangin humhalh tlat a ngaih thu a sawi bawk a ni.
Hun kaihruaitu Principal Secretary, Forests, Environment & Climate Change Pu Lalram Thanga’n he Ni tobul leh hman a lo nih chhoh dante sawiin adventure tourism ah Mizoramin potential a neih that thu leh tuhnaia thalaiten hemi kawnga hma lakna an nei chu lawmawm a tih thu a sawi a. Chutih rualin nungcha te humhalh chungin ram mawina ti chhe lo zawnga hma lakna leh ruahmanna te siam a tul thu a sawi tel bawk.
Day thupui ‘Biodiversity and Sustainable Tourism’ hmangin Dr. Samuel Lalronunga, National Postdoctoral Fellow, Department of Zoology, Pachhunga University College leh ‘Mammalian Diversity of Mizoram essential tool for Sustainable Tourism’ tih thupui hmangin Dr. Lalthanzara, Asst. Professor, PUC ten thusawina neiin thil pawimawh te an tarlang.
He ni puala Photography Competition a titha te hnenah Pu Rosiama Vanchhawng, PCCF in lawmman a sem a, Pu Liandawla, Member Secretary, Mizoram State Biodiversity Board-in lawm thu sawiin programme kharna a nei a ni.
