Ruihhlo hman khawloh leh a tawlhruk dona Ni, International Day against Drug Abuse & Illicit Trafficking chu vawiin khan khawvel pum a hman a ni a. He ni pual hian Mizoramah pawh vawiin chawhma khan Social Welfare Department buatsaihin khuallian Chief Minister Pu Lal Thanhawla hovin Sipai Lammual ah hun hman a ni. School Education Minister Pu H. Rohluna chu khualzahawm niin, Higher and Technical Education Minister Pu R. Romawia leh Deputy Speaker Pu R. Lalrinawma te an tel bawk. Excise & Narcotics Department buatsaihin Organising Committee in a lo rel tawh angin AR Ground Basketball Court-ah Court-in a chinfel tawh atangin drugs hal khu buaipuiawm tham lo Heroin Kg 4.388 (Rs. 84,37,000 hu) chu Chief Minister ho hian halral a ni bawk.  

Chief Minister Pu Lal Thanhawla chuan ruihhlo chi hrang hrangte chu ram hmasawnna tithuanawptu leh mihring hrisel lova min siamtu, khawtlang tibawlhhlawhtu a nih thu leh, ruihhlo do hna chu mitin mawhphurna a nih thu a sawi a. Sawrkar ang pawhin nasa taka hma lak niin sum pawh sen a ni tawh a, seng mek niin a tul naah sen belh zel a la ni ang, tiin Chief Minister chuan ruihhlo laka fihlim leh tawlhuk do chu a ngaihpawimawh avangin tlawmngai pawl leh kohhran te nen thawhhona nei a hma lak zel a nih thu a sawi. Mizoram Police ten Assam Rifles leh BSF te nen tangkawpa ruihhlo leh a tawlhtute an man fo thin thu sawiin Chief Minister chuan kawng hrang hranga hmalakna hi siam ni mahse, do rem tak tak tur chuan tun a thalaite hian ruihhlo laka filhlim duhna leh tumna rilru an put a pawimawh em em a ni, a ti a. De-addiction centre te pawh awm nual in, henga awmte pawh hian tumruhna an neih a, chakna an neih theih nan rinna an neih tel a duhsak thu a sawi. Zirlai kalkhawmte chu Chief Minister chuan ram nghahfak tling, nakin lawka mahni ke a ding thei an nih ngei nan vawiin atanga an nun an uluk a, chumi atan chuan nu leh pate thu awih, aia upa zah nachang an hriat a, inngaihtlawmna an nunah an chhawm nun zel pawimawh a tih thu a sawi a; vaihlo zuk leh hmuam hi ‘gateway substance’, ruihhlo dik tak ti tura hnukluttu a nih avangin chung lakah chuan naupang leh thalaite fimkhur turin a chah bawk. 

School Education Minister Pu H. Rohluna chuan ruihhlo avanga harsatna hrang hrang kan tawh te, ruihhlo bawiha tang mekte dinhmun leh kan hmalak zel dan tur uluk taka kan ngaihtuah thar a ngai a ni, a ti a. Nikum 2017-a Social Welfare Department hnuaia ruihhlo hmansual leh hluar dan chungchang zirchianna “Baseline Survey on Extent & Pattern of Drug Use” atanga a lan danin thalai kum 15 atangin meizial leh hnim chi (solvents) atanga Ganja ti chhovin, kum 19 ah chuan damdawi ruihtheih atanga inchiu chi ah an lut chhoh tak thin thu a sawi a. Hemi a nih avang hian Mizoram sawrkar chuan Social Welfare Department kaltlanga NEDP hnuaiah School Drug Intervention programme chak taka kalpui tura hmalak mek a nih thu te, NEDP hnuaiah vek ruihhlo ngaite enkawlna hmun tihchangtlun leh chhawm dawl nan sum leh pai thahnem tak dah a nih thu te Minister Pu H, Rohluna chuan a sawi a. Naupang zinga ruihhlo laka invenna thuchah leh inzirtirna chu thil hmanhmawhthlak a ni tiin, an himna chu mi tam zawk himna , chu chu hnam pum himna a nih bawk thu a saiw a. Ruihhlo bawih a tang mekte pawhin hmalakna changtlung tak awma te chu tha taka an chhawr tangkai a duhsak thu Minister hian a sawi bawk a ni. 

Vawiina International Day against Drug Abuse & Illicit Trafficking pual programme buatsaih hi sorkar a department hrang hrang hotulu pawimawhte bakah zirlai thahnem tak an kal a. Social Welfare Department Secretary Pi K. Vanlalrawni chuan kalkhawmte lawmna thu sawiin, zirlai kalkhawmte hian ruihhlo laka fihlim turin a rualin thu an tiam a, pledge taking hi Lalremsiama Darchhun, HSLC 2017 Topper chuan a kaihruai a ni. Sawm bikte atangin Testimony leh Motivational Speech, ruihhlo laka fihlim tura infuihna thu te ngaihthlak ni bawkin, inkhawm hi Pi Laldikkimi, Social Welfare Department Director chuan lawmthu sawiin a khar a ni. 

Khuallian Chief Minister hian school naupangte Placard siam intihsiakna buatsaih a titha ber mi pathum hnenah lawmman a sem bawk a. Lawmman dawngtute chu pakhatna  Govt. K.M. Hr. Sec. School, pahnihna MICE Hr. Sec. School leh pathumna Govt. Chaltlang High School te an ni a, lawmman dawngtute hi Certificate pek theuh an nih bakah pakhatna hi Rs. 3000, pahnihna Rs. 2500 leh pathumna Rs. 2000 pek an nih bakah, placard making competition a school tel zawng zawng chu Rs.1000 participating prize pek vek an ni bawk.

Khawvela ram hrang hrang inthlunzawmna, United Nations General Assembly chuan December ni 7, 1987 khan khawvela ruihhlo hman khawloh leh a tawlhrukna dona ni atan kum tin June ni 26 hi khawvel pumah hman thin nise tiin a rel a. Kum 1988 June ni 26 atang khan khawvel ram hrang hrang sawrkar, mipui vantlang leh pawlhovin rilru hmun khat pua ruihhlo hmansual leh tawlhtute dona ni atan hman a ni ta a ni. He ni hi Chinese mi ropui Lin Zexu-an China rama ruihhlo tawlh a do avanga kum 1839 - 1842 chhunga Opium War chhuak ta hriatrengna atana thlan a ni. He ni hman dan tur chu United Nations Office on Drugs & Crime (UNODC) in kengkawhin, kum thenkhatah Thupui bik neia Campaign dan tur a ruahman thin a ni. Kumin thupui atan hian UNODC chuan “Listening to children and youth is the first step to help them grow healthy and safe” (Him tak leh hrisel taka thalai leh naupangte an than theih nan an sawi tur neih ngaithla phawt rawh) tih thlan a ni.