816/2024-2025

Aizawl the 14th June, 2024 : Vawiin khan Social Welfare, Tribal Affairs, Women & Child Development kaihhruaina hnuaiah tun thla June 26, 2024 a ‘International Day Against Drug Abuse & Illicit Trafficking’ hman dan tur chu Secretariat Conference Hall-2, MINECO-ah relho a ni a. Kumina thupui tur atan ‘The Evidence is Clear : Invest in Prevention’ (‘Kan dinhmun a chiang e : Invenna kawngah tan i la ang u’) tih ruat a ni.

Vawiin Organising Committee thutkhawmnaah hian sorkar line department hrang hrangte bakah 23 Sector Assam Rifles, BSF, Central YMA, MHIP General Headquarters, Mizoram Drug User Forum leh FINGODAY aiawhte an tel kim hle a. Meeting hawnnaah Secretary, SWTA,W&CD Pi Sangchin Chinzah chuan thuhma sawiin kumtin he Ni hman thin chu kuminah pawh a huamzau thei ang bera hman a, ruihhlo lakah inven pawimawhzia chu naupang, thalai leh mipuite uar taka zirtir hi a pawimawh hle a ni a ti.

Kumin June 26-a ‘International Day Against Drug Abuse & Illicit Trafficking’ hman tur hi Aizawl leh District zawng zawngah hman nise tih rel a ni a. A hmanna tur pui ber Aizawl-ah chuan Vanapa Hall-ah hman ni ang a, he hunah hian Mizoram Chief Minister Pu Lalduhoma chu Khuallian atan beisei a ni. Aizawl District chhungah De-Addiction Centre 6 awmte hnenah Nasha Mukht Abhiyan atangin he Ni puala hun an hman ve theih nan cheng sing 1 theuh pek a ni bawk ang. District tinah Ruihhlo Do Committee te chuan remchang anga he Ni puala hun hman ve a, an District chhunga Drug Treatment Centre-te, Jail leh MSACS enkawl lai Home-te tlawhchhuah tum a ni bawk.

June ni 26 zingkarah Assam Rifles-te huaihawtin International Day Against Drug Abuse & Illicit Trafficking pualin ‘Walkathon’ neih a ni dawn a. Excise & Narcotics Department leh Mizoram Police te pawhin chawhnu lamah he Ni pual hian hun an hmang dawn a ni.