815/2024-2025

2024 Nikir thla ni 14: Khawvel puma thisen pe ṭhinte chawimawina leh thisen pe tura infuih tharna ni atana hman ṭhin, "World Blood Donor Day" (WBDD) pualin vawiin khan Mizoram State AIDS Control Society (MSACS), District Hospital Lawngtlai Blood Bank leh Association for Voluntary Blood Donation (AVBD), Lawngtlai te ṭang ho buatsaihin Lawngtlai Bazar YLA Hall Committee Room-ah hun hman a ni.

He hunah hian Lawngtlai Additional Deputy Commissioner Pi B. Malsawmtluangi chu Khuallian a ni a. Mihringin nun nana thisen kan mamawh piah lamah, hrisel leh chak ṭha taka awm turin thisen thianghlim kan mamawh tih sawiin, thisen pe ṭhinte zarah hrisel lohna leh vanduaina avanga thisen hloh leh tlachhamte nunna hlu tak chhan chhuah a nih ṭhin thu leh thisen pek chu mi tam tak tan beiseina, damna, nunna leh hlimna thlentu a nih thu a sawi a. Damdawi in hrang hrangah nunna chhan nana thisen mamawhna a sang hle tih sawiin, a hun takah a mamawhtute'n thisen thianghlim an dawn theih nan a thlawna thisen pek kawngah mi tin ṭhan harh a ṭul tih a sawi a. Thisen pe theia awm chu Pathian malsawmna a nih bakah, mi dang tana malsawmna nih theihna kawng ṭha tak a nih thu sawiin, mi nunna hlu tak chhan nana a thlawna thisen petute chu an hlu a, chawimawi tlak leh chawimawi tur, ngaihsan tlak leh ngaihsan tur an nih angin mite entawn atana tar chhuah leh chawimawi zel an phu a ni, a ti.

He hun hman hi AVBD Lawngtlai Executive Committee Member Tv. Vanlalzapa'n a kaihruai a. Senior Adviser Rev. K. Lalchamliana Lai chuan hunserh hmangin, Blood Bank leh AVBD aṭangin report ngaihthlak a ni a. Mimal thisen pe ṭhate leh pawl hminga thisen pete chawimawina hlan an ni a. AVBD Secretary Tv. VL Hmangaihzuala chuan lawm thu sawiin hun a khar a ni.

He hunah hian Lawngtlai District-a mimal thisen vawi 50 pe tling chin mi 5 leh vawi 30 pe tling chin mi 10 hnenah chawimawina thuziak hlan a ni a. Nikum June ni 14 leh kumin June ni 14 inkara pawl leh kohhran anga thisen pe - Lawngtlai Area Ṭhalai Kristian Pawl Coordination Committee (LAṬKP); Lairam Isua Krista Baptist Kohhran Central Ṭhalai Pawl; Government Lawngtlai College NSS; 3rd Battalion IR, Lawngtlai; PYD (Mizoram) Lawngtlai Pastor Bial leh Assam Rifles, Lawngtlai te hnenah chawimawina thuziak hlan a ni bawk.

Kum 2023 June leh 2024 June thla inkar chhungin District Hospital Lawngtlai Blood Bank chuan thisen unit 1,591 lain, chu'ng zinga unit 1,147 (72.10%) chu mimal tih bik awm lova a mamawh apiangin an hman atana pek (voluntary) niin, unit 444 (27.90%) chu mimal tan bika pek (replacement) a ni a. Thisen unit 1,062 chu a thlawna thisen pek runpui (voluntary blood donation camp) ṭum 40 buatsaih aṭanga dawn a ni. Hemi chhung vek hian Blood Bank aṭangin thisen hi damlo mamawhte tan District Hospital Lawngtlaiah unit 827, Lairam Christian Medical Centre & Hospital-ah unit 613 leh Christian Hospital Lawngtlaiah unit 75 pek chhuah a ni.