546/2024-2025

Aizawl, 22.5.2024: International Day for Biological Diversity 22nd May hi kumtin a lawmna hi hman thin a ni a. Kuminah pawh hian Mizoramah chuan a lawmna pui ber hi Forest Training School, Bethlehem Vengthlang-ah State Biodiversity Board buatsaih a hman a ni a. He ni puala Mizoram University PG student te tana Essay Writing Competition lawmman sem a ni bawk.

IDB, 2024 lawmna inkhawm ah hian Pu AK Biswal, IFS, PCCF, EF&CC chu khuallian a ni a. Biodiversity humhalhna lama mipuite fuihna thuchah sawiin, keimahni a ram neitute leh a chhunga chengte hian biodiversity humhalhna lama tih tur leh mawhphurhnate tarlangin, hemi kawngah hian mipuite nasa zawka tan la turin a sawm a ni. Hemi kawnga hma la tur hian khawtinah BMC te an ding a ni tiin, hengte hian anmahni khua theuhvah an biodiversity humhalh tur a tan an lak a tulzia te a sawi a; hmasawnna daih rei leh rintlak nei turin theihtawpa tan la theuh turin a chah a ni. Khuallian chuan Danin a phut angin kan chanvo leh mawhphurhnate hlenchhuak thei theuh turin kan tanrual a pawimawh a ni tih a tarlang. Kan tu leh fate tana chenna tlak a kan ram siam turin mimal tin ten mawhphurhna kan nei vek a, chutianga kan tih tur te kan hlenchhuah theih nan le hhmasawnna rahbi thar kan kai theih nan he ni kan lawmmna hian rah tha chhuah ngei si tiin Pu AK Biswal kalkhawm te hi a sawm a ni.

IDB, 2024 lawmna inkhawm hi Pu Agni Mitra, IFS, Field Director, Dampa Tiger Reserve chuan a kaihruai a. Pu Lalramthanga, IFS, PCCF (HoFF) Rtd. in Power Point Presentation hmangin Mizoram a biodiversity conservation lama kan mamawh thil pawimawh tak tak te tarlangin kalkhawm te hi zirtirna a pe a ni. Dr. B Malsawmkima, Scientific Officer, Mizoram State Biodiversity Board in Mizoram SBB hmalakna hrang hrang a sawi bawk. Biodiversity Management Committee (BMC) atangin Pu Lalrinawma, Sihphir, BMC member leh Pu Lalzawnpuia, N Lungleng BMC member ten BMC pawimawhna leh an hmalakna hrang hrang bakah hmachhawp leh harsatna awmte an sawi bawk a ni. Pi Jenny Sailo, Principal forest Training School chuan lawmthu sawiin hun a khar a ni.

He hunah hian Mizoram State Biodiversity Board Ex-Officio leh Expert Member te, Biodiversity Management Committee (BMC) te, EF&CC Department Officer leh staff te bakah Environment NGOs hrang hrang te leh Bethlehem Vengthlang Middle School zirlaite an tel bawk a ni.

International Day for Biological Diversity 2024 pual hian May ni 10 khan Essay Writing Competition buatsaih a ni a. Vawin khan khuallian in lawmman a sem a, Lawmman danwgtute chu hengte hi an ni:

1st Prize: Remale Ruth Blessy, Dept of Biotechnology, Mizoram University

2nd Prize: Dodie Zoliansanga, Dept of Biotechnology, Mizoram University

3rd Prize: Kuku Chaitom, Dept of Forestry, Mizoram University

Biodiversity day pual hian May ni 23 leh 24 hian Biodiversity Management Committee (BMC) member te in tihchaktawnna tur atan "Empowerment and strengthening exposure visit" chu Reiek leh Sailam ah neih tum a ni bawk.

Thilnung chi tinrengte humhalh a venhim an nih theihna turin United Nations Convention on Biological Diversity (CBD) chukum 1992 khan Brazil khawpui Rio de Janeiro a Earth Summit ah khan din a lo ni tawh a. He Convention pawimawh taka tel ho zingah hian India ram pawh hi party pakhat zingah telin Agreement ziaktu ram 196 zingah a tel ve bawk a ni. Hemi denchhen hian 22nd May hi 'International Day for Biological Diversity' atan United Nations chuan a lo puang a, kumtin thupui thlan bik neih a ni thin a, kumin thupui (Theme) atan hian "Be Part of the Plan" tih hi thlan a ni.