545/2024-2025 

Lunglei; the 22^nd May, 2024: Vawiin chawhnu dar 1:00 khan CMO office, Lunglei buatsaihin  World TB Day 2024 leh TB Free Village lawmna programme, DEO Conference Hall Lungleiah hman niin,  programme hi Dr. Lalrinthangi, Dy.CMO chuan kaihruaiin;  district Bawrhsap Pi Ramdinliani chuan khuallian niin hun a hman pui a. Rev.Lalrinliana, BCM Chanmari Pastor bialin hunserh a hmang a ni.

Khuallian Pi Ramdinliani chuan undivided Lunglei District (Lunglei & Hnahthial) chu a area anga zawng chuan Mizorama District zau ber a nih avangin, inkalpawhna kawngah te, hriselna kawnga hmalakna kawngah te hmalak a harsa bik em em a. District dangte nen chuan khaikhin chi pawh a nih loh laia TB Free Village nei tam ber  district kan ni thei chu thawktute inpekna leh khawtlang hruaitute hmalakna rah a ni a, an fakawm hle a ni, a ti. TB natna chu inkaichhawn theih natna a nih avangin mihring tamna hmun leh mihring cheng an bitna hmunah a tam duh bik a ni. India ram pawh khawvela TB natna vei awm tamna pawl a ni a, amaherawh chu Sawrkarin theihtawpin hma a la a, zawi zawi in hman kan sawn zel a, kum 2025 ah chuan India ramin TB umbo tumin theihtawp a chhuah mek a ni. TB natna veitu tam ber chu thalaite an nih thin avangin chhungkua leh khawtlangah nghawng a neih phah hle tih khuallian chuan sawiin, thalai zawk ten TB natna an vei avangin hnathawk hlei theilo in an awm a, chhungkua leh ram economy-ah nghawng a nei thin a ni. Hetiang anih avang hianTB natna veite an damchhuah ngei ngei theihna turin sawrkar pawhin a enkawlna kawngah uluk takin ruahmanna kalpui tur a siam a ni, a ti bawk. Pi Ramdini chuan TB natna vei enkawl mekte pawhin treatment tha taka lak leh damdawi eitur tha taka ei chu ngaipawimawh se a duhthu leh treatment tha taka an lakloh chuan TB natna vei zat dinhmun ti danglam theitu an ni tih an inhriat a tul a ni, a ti. TB natna chu mi tam takin kan endan a diklo a, kan thinhrik thin a, TB natna hi thinhrik leh hlauh chi a nilo tih kan inzirtir tam angai a. kan chhungte zingah TB natna vei an awm pawhin thinhrik leh enhrang mai lovin natna dang ang bawkin enkawl dam thuai theih a ni tih kan hriat a tul hle a ni. TB natna umbo tura Department hmalaknaah Lunglei District-a khawtin hruaitute chu thawktute tha taka tawiawm thin tura chahin, tunah TB Free Village lawmmman dawngtu khaw 18 te chu Lunglei District tana Meichher chhi engtu an ni tih inhre tur leh an thawhrimna chuan rah tha tak a chhuah ngei a beisei thu khuallian Pi Ramdinliani chuan a sawi bawk a ni.

Dr. K. Lalhmachhuana, District TB Officer chuan report pein Gov't of India. Ministry of Health & Family Welfare chuan India ramah kum 2025-ah TB natna umbo a nih theih nan State tinah TB Free Village kalpui tura a tih angin, Mizoramah pawh kalpui a ni a. Kum 2023 khan Mizoramah TB Free Village puang thei District pathum awmin Lunglei District chu a puang tam thei ber a ni a; khaw 18 TB Free Village-ah puan an ni, a ti. Kum 2023 khan Lunglei District-ah TB vei  mi 150 hmuhchhuah niin; an zinga mi 15 chu TB HIV an ni a, mi 134 enkawl dam tawh niin; mi 5 in an thihpui a, mi 11 enkawl mek an ni, a ti. Kumin chhung hian Lunglei District-ah TB vei mi 62 hmuhchhuah tawh ni bawkin; an zinga mi 4 chu TB HIV an ni. Lunglei District-a TB vei hmuhchhuah tam berte hi nikumah khan kum 20-29 inkar an nih a, kuminah thung chuan kum 30-39 inkar a mi te an nih  thu a tarlang bawk.

Vawiina World TB Day 2024 leh TB Free Village lawmmna programme-ah hian heng a hnuaia TB free village :

1) Chhipphir  2)Bualpui ' V'  3)Sekhum  4) Mualthuam North 5) Sertlangpui  6)Serte  7)Thuampui 8) Vaisam  9) Chithar  10)Thangte  11) Sairep 12) Belthei  13) Tarpho 14) Thualthu 15) Bualte  16) Kawlhawk 17) Zotuitlang  18)Ralvawng khua te  hnenah  Mahatma Ghandhi Statue (Bronze) leh Certificate an  hlan a, TB Free Village an nih chhunzawm zel chuan Silver leh Gold thlengin an la dawng leh thei dawn a ni.