Vawiin chawhma khan Zarkawt Recreation Centre-ah International Day for Persons with Disabilities programme hman a ni a, School Education Minister Pu H. Rohluna chu Khuallian a ni a. Programme zawh hnu hian rualbanlote tana buatsaih ‘Special Olympics 2017’ chu neih nghal a ni. He hun hi Social Welfare Department, RMSA, SSA, SCERT, National Institute for Locomotor Disabilities-North East Regional Centre(NILD-NERC), Health & Medical Education Department, Health Services Department, Spastic Society of Mizoram, Differently Abled Society, Mizoram Blind Society, Zoram Entu Pawl tangkawp buatsaih a ni a. Kum 2017 atana he Ni thupui chu 'Transformation towards sustainable and resilient society for all' tih a ni.
Khuallian Pu H. Rohluna chuan Rualbanlote Ni-ah an tan programme buatsaih a ni chu lawmawm a tih thu a sawi a. Mizoram district hrang hrang-ah RMSA hmalakna hnuaiah hman anih hnuin Aizawl-ah hman a nih thu a sawi a. Tun hma kha chuan kan khawtlangah dinhmun hniam zawkah kan dah thin a, tunah erawh chuan kan changkang tawhin kan ngaihdan kan thlak tawh a ni tiin theihna bik nei angin kan pawm tawh a ni, a ti a. Rualbanlote thiamna leh theihna haichhuah sak hi kan tihtur a ni tiin hemi kawngah hian mi thahnemngai tak tak, hlawkna um lova, rualbanlote tana inpe an awm a ni tiin anni hmalakna avangin mipui pawhin kan hmuhdan pawh a danglam hret hret a ni, a ti a. Heng mi thahnemngaite hnathawh hi a chhuanawm hle a ni tiin hei hian kan khawtlangah pawh nasa takin rualbanlote dinhmunah hmasawnna a thlen a ni, a ti a. RMSA hmalakna tarlangin district tinah ‘Resource Room’ awmin he room-ah hian eye screening, speech training, hearing trial leh physical therapy tihsak thin a nih thu a sawi a. Special Olympics hlimawm tak nei turin duhsakna a hlan nghal bawk a ni.
International Day for Persons with Disabilities hi December Ni 3-a hman thin niin chawlhniah a tlak avangin vawiin hian hman a ni a. Rashtriya Madhyamik Shiksha Abhiyan (RMSA) hnuaiah hian rualbanlote tan cell pawimawh tak Inclusive Education for Disabled at Secondary Stage(IEDSS) a awm a, IEDSS-in a tum chu zirlai rualbanlo ten lehkha an zirna atana harsatna awm zawng zawng sut kian sak a ni a. Hemi atan hian zirlaibu, wheelchair, hearing aid, crutches, spectacles, uniform, reader for blind, escort allowance leh a dangte a thlawnin pek thin a ni. Social Welfare Department, Health Department leh RMSA tangkawpin Medical assessment cum Identification camp, doctor-te nen neih thin niin Disabled ID a hmunah pek nghal an ni.
Vawiin programme hi Differently Abled Society Chairman, Pu Nicky Chhakchhuak chuan a kaihruai a. Kalkhawmte lawmna thu Social Welfare Department Secretary Pu P. Lalchhuanga chuan a sawi a. NILD-NERC Officer Pu Alendro Tripathi chuan thusawiin rualbanlote chu ‘persons with divine ability’ tia koh an nih thu a sawi a. Special Olympics hi programme neih hnu hian hman zui nghal a ni a. Infiamna hrang hrang te chu – Wheelchair Race, Musical Chair, Spoon Race, Three legged Race, Dead Ball leh Football a ni. Thutak Nunpuitu Team (TNT), Gilead Special School, Mizoram Blind Society, Spastic Society, Differently Abled Society, Deaf School of Mizoram, Samaritan Blind Society leh a dangte an tel a ni.
