Vawiin chawhma khan Zarkawt Recreation Centre-ah Social Welfare Department, Health & Family Welfare Department, SCERT, RMSA leh SSA tangkawp buatsaihin kumin International Day of Persons with Disability pual programme hman a ni a. He ni hi khawvel pum huapin kum tin December ni 3 a hman thin a ni a, kumin hian Inrinni ah a tlak avangin Mizoramah chuan a lawmna hi vawiin ah hman a ni.
Pi Vanlaldini, Social Welfare Department Director chuan he hun hi a kaihruai a. Pu Alendra Tripath, Officer-in-charge NILD chuan rualbanlo te tana NILD (National Institute for Locomotor Disabilities, NIOH tia vuah thin) hnathawh dan tlangpui a sawi a. Sorkar laipuia Ministry of Social Justice and Empowerment hnuaia scheme a neih hnuaia rualbanlo te tan hmanrua hrang hrang – wheelchair, hearing aids, prosthetics, orthotics leh a dang hrang hrangte an centre-ah a awm reng thu leh, a thlawn a registration a tih theih thu a sawi bawk.
Rualbanlo te tana hnathawh that vanga lawmman Recognition for Examplary Work for Disabled Persons chu vawiin hianpawl pahnih - Spastic Society leh Mary-Hechia Residential Special School, Zawngling-te hnenah hlan an ni a; Citation leh pawisafai cheng sing khat a keng tel a ni. Vawiin hun hi mimal leh pawl hrang hrang atnanga chhimtu zingah Mizoram Blind Society, Spastic Society, Differently Abled Society, TNT leh Samaritan Blind Society leh Gilead Special School te an tel a ni.
Kumin International Day of Persons with Disability atana thupui chu “Achieving 17 Goals for the Future We Want” tih a ni. Mizoramah hian Rualbanlo hi kum 2011 Census Report angin mi 15,680 an awm a. Heng zinga mi Sing chuang zet chu Social Welfare Department chuan an Certify tawh a. Assessment and Certification Camp hi hmun hrang hrangah kalpui mek zel ani bawk. Hamthatna chi hrang hrang- Disability Pension, Economic Rehabilitation, Unemployment Allownces, leh thil dangte tunah hian kalpui mek ani a. Heng bakah pawh hian Sawrkar laipui atanga Scheme lokal thar, Health Insurance Scheme-te, Scholarship-te, Poverty Alleviation atan In hmun Lo ram leh hamthatna dang awmte haichhuak tura hmalak mek a ni.
