Art & Culture Minister Pu R. Romawia chuan Mizote handloom lamah kan sang hle in talent leh remhriatna tha tak malsawmna kan dawng in, zethlak phei chu kan thiam hle a. Heng kan kutchhuak, kan hnam history leh ziarang a bet tlat te hi chu kan hum leh hlut thiam a pawimawh a ni, a ti. He thu hi vawiin chawhnua I&PR Auditorium-a Pi Boichhingpuii lehkhabu ‘’Mizo La Deh leh Zethlak” tih a tlangzarhna ah a sawi a ni.

Minister chuan hnam thang zelah thil kalphung a inher danglam chho zelah thin a, Mizo ten kan ngaihhlut leh chhuan deuh, kan la deh leh zethlak dan pawh hian tih danglam a tawk a. Chungah chuan a bulthut, a ‘original’ ang chiah a nih loh vanga ngaihhlut loh ngawt tur a nih loh thu sawiin, neitu kan nihna erawh kan hum thiam a pawimawh a ni, a ti a. Art & Culture Department in Mizo puan langsar bikte neitu nihna a buatsaih dan te a tarlang bawk a. Minister chuan vawiina lehkhabu tlangzarh tak chu Mizo Culture zir duh te tan pawh research tam tak beih hnu a siam anih vangin rawn tlak tak a tling ngeia a rin thu a sawi a ni.

Vawiin hun hi Prof. Laltluangliana Khiangte in kaihruai in, Pu C. Chhuanvawra, Padma Shree chuan lehkhabu thlirlawkna a nei a. A ziaktu Pi Boichhingpuii chuan lehkhabu buatsaih dan tlangpui a sawi bawk a ni.