Khawvel pum huapin chhiat thutna laka invenna ni chu October ni 13 khan hman a ni a, Mizoramah erawh chuan remchan zawkna avangin ni 21 October, 2011 khan Mt. Carmel School, Chaltlang-ah State Disaster Management Authority huaihawtin chhiat rup thula chhanchhuah hna entirna ‘Mock Drill’ buatsaih a ni.
He hunah hian Mt. Carmel School zirlai leh hostel naupangte chuan a lema changin, lirnghing thlen huna a rang thei ang bera chhanchhuah hna thawh dan an zir a ni. State Disaster Management Authority chuan chhiatrupna eng chi pawh a thlen thulah school himna chu a ngaih pawimawh ber zing a mi a ni a. Chuvangin district leh thingtlang school zawng zawngah he zirtirna hi kalpui vek tum niin zirtirtu thahnem tak te training pe tawhin chungte chuan an school zirlaite hnenah zirtirna an pe chhawng ngei ngei tura beisei an ni.
Mock Drill hi kum 2007 atanga neih tan a ni a. Aizawl khawpuia school lian deuhah chuan zirtirtute leh zirlai naupangte nen chhiat thutna - lirnghing emaw kangmei chhuak - laka inven dan leh chhanchhuah hna hi zirho fo tawh a ni. Kumina International Disaster Risk Reduction Day thupui atan “ Making Children and Young People Partners for Disaster Risk Reduction” tih hman a ni nghe nghe a ni.
