Nimin khan International Fund for Agriculturural Development ( IFAD) Design Mission Team Mr. S. Shetty, Team Leader, Mr Shriram Subramanium,  Proramme Analyst leh Mr Bhavit, IDH-te chuan  Mamit District chhunga tlangram lo neih dan tha zawk duangchhuak a,  eizawnna ngialnghet dinna kawnga hmalakna tur leh hmachhawpte a hmuna rawn enchiang turin  Mamit an rawn thleng a. Tourist Lodge Mamitah Mamit District Bawrhsap leh NLUP Line Department leh  Media Officer te’n an lo dawngsawng a ni. 

IFAD team-te leh NLUP Line Department-te hi  D.C Conference Hall, Mamitah Pi Lalbiaksangi District Bawrhsap kaihruainain meeting neih nghal a ni a. Meeting-ah hian Pu H. Lianzela Addl D.C/ Nodal Officer NLUP chuan inlawmna thusawiin  Mamit District chhunga NLUP Line Department hrang hrang pariat te chuan an hmalak tawhna hrang hrangte leh hmachhawpte a lem nen an entir a,  IFAD Team te hian Mizoram chu tlangram lo neih dan tha zawk hmanga hmalakna tur atana thlan a nih thu sawiin , tihdanphung pangngai kalsana ruahmanna tha zawk duanchhuah ngei a nih an beisei thu  sawiin he project hnuaia hmalak tum dan tlangpui a lem nen an entir a ni. Mamit District chu a ram leilung a thain eizawnna ngialnghet dinna kawngah pawh hmathlir tha tak neia kal a nih chuan beiseiawm tak a nih thu an sawi bawk. 

Meeting-ah hian  NLUP Line Department hrang hrang pariat te bakah  Joint V/C, Mamit District V/C Association,  Sub Hqrs YMA, MHIP, MJA, Mamit, Oil Palm Growers’ Association , Fish farmers’ Assocition atangin an President theuhte an tel a ni. 

IFAD Design Mission Team-te hian naktuk hian Mamit District chhunga  Bawgva, Darlak leh Tuidam khua NLUP tanpuina dawngtute a hmunah tlawhin an dinhmun zirchianna an nei ang.  

International Fund for Agriculturural Development ( IFAD) Design Mission Team-te pual hian vawiin tlaiah Mamit District Bawrhsap chuan a Pisa tualah cultural programe  buatsaihsakin Mamit Cultural Organisation-te chuan hnam lam chi hrang hrang an entir bawk a ni.