Horticulture Minister Pu P.C. Lalthanliana chuan Lunglei Tlawng lei bula Rural Vegetable Market sak thar chu tukin khan a hawng a ni.

Pu P.C. Lalthanliana chuan kan thlai thar chhuah te hralhna kawngah market kan mamawh thin a, DHO-te hmalaknaa market hawn a ni chu lawmawm a tih thu a sawi a. Thlai thar kawngah buaipui tham thar tura kan kalphung kan thlak danglam a tul thu sawiin, kum 2017-18 chhungin Horticulture Department chuan thlai ah zikhlum leh tomato te leh thei ah – dragonfruit leh serthlum te chauh thar tura ruahmanna a siam thu a sawi a ni. Kuthnathawktute chu department hotute kaihhruaina hnuaia thiamna sang zawk an ban theih nan rilru inbuatsaih turin a chah a, ram pawn thil zir a tul chang pawha ruahmanna fel tak an neih lawk a duh a ni. Greenhouse hmanga thlai tam zawk thar chhuak thei turin Haulawng leh Mualthuam rama Centre of Excellence chu chhawr tangkai tura a duh thu a sawi a. Sawrkar chuan tih taka taka titute chu a ensan ngailo a, an tan a inhawng reng a ni, a ti bawk.

Pu Vanlalnuntluanga Renthlei, DHO, Lunglei chuan he Rural Vegetable Market hi Mission for Integrated Development of Horticulture (MIDH) hnuaia cheng nuai 12.5 senga sak a nih thu a tarlang a. Lunglei Zotlanga Pu Johan Zosangliana’n a sakna tur ram a pek thu a tarlang bawk a ni.

He hawnna inkhawm hi Pu C. Lalremsiama, Asst. DHO chuan kaihruaiin, Pi Lalliansiami, President chuan Tlawng Bazar Association aiawhin lawmthu a sawi a. He hun hi Pu V. Lalremsanga, HEO chuan lawmthu sawina in a khar a ni.