Vawiin khan Horticulture Minister Pu P.C. Lalthanliana chuan Lungleia Centre of Excellence for Fruits chu a hmunah tlawhin hna kal lai mek te a enfiah.
He Centre of Excellence for Fruits hi Indo-Israel Action Plan hnuaia ruahman niin, a dinna tur hi Mission for Integrated Development of Horticulture (MIDH) kaltlanga sanction a ni a. Lungleia cheng nuai 900 senna tur Centre of Excellence for Fruits din mek hi hmarchhaka a hmasa ber tur a ni. Kum 2014-15 atang khan Tlaukunga Marketing & Co. te chuan turnkey project angin an thawk tan a, consultant leh technician te duhthusam an hmuh theih loh avangin cheng nuai 500 man hu chauh an thawk hman a ni. Hetia thawh zawm theih a nih tak loh ah chuan Horticulture Department kutah January 2017 khan hlan a ni a. February 2017 atang khan Department chuan hna hi thawh chhunzawmin, field consultant 3 te lak belhin a hmunah an vil reng a ni.
A hmunhma hi kumin May-June thlaa peihfel hman rin a ni a, June-July ah thlai/ thei chi kui tiah hman beisei a ni. Drip irrigation hi October-November atanga mumal taka kalpui theih beisei a ni bawk.
