Vawiin khan Mizoram State Museum, Art & Culture Department chuan Mizoram State Museum-ah International Museum Day an hmang a, Pu R. Hmingthanzuala, Director, Art & Culture Department chu Khuallian niin International Museum Day lawmna hi a hawng a; P.C. Zosangpuii, Museum Curator chuan inkhawm a kaihruai a ni. He ni pual hian mipui tan en man awm lovin Museum an hawng bawk a ni. Kumina khawvel pumhuapa International Museum thupui hi “Museums as Cultural Hubs, the future of Tradition” tih a ni.

Khuallian Pu R. Hmingthanzuala chuan Mizoram State Museum-in a tum pakhat chu Mizo nunphung leh nun zemawi te chawi nung zel chunga thang lo thar zelte hnena kan hnam nun zia leh nunphung ataka hmuh tir leh thiam tir hi a ni, a ti a. Mizo hnam lo dinchhuah zelna tur leh kan hnam inpumkhat zelna turin kan nihna dik kan hriat chian a, chu kan nihna chu zahpui lova, chhuang tak chunga chawi lar a, chawi nung zel turin Mizoten tan la zel ila, kan hnam thilte kan hriatchian hmasak a, hnam dangte pawh hrilh thei tur khawpa kan zir chian hmasak a ngai a ni, a ti bawk a ni.
 
Mizoram State Museum hian 2018-2019 sawrkar kum chhung khan tlawhtu mi 13157 a nei a, heng zinga mi 14 hi VIP an ni a, foreigner visitors mi 33 a nei bawk. Mizoram State Museum-ah hian Gallery 6 (paruk) awmin Museum objects 2679 dah a ni a, heng zinga 729 te hi show case chi hrang hrang 109-ah pho chhuah a ni a, a bak zawng hi reserve collection-ah dah a ni. India hmun hrang hrang heng Tribal Museum, Ranchi-ah te, Bhopal Museum-ah te, Silpigram Museum, Guwahati-ah te, Jawahar Lal Nehru Museum Itanagar-ah te Mizo hmel lanna Museum Objects hi eng emaw zat thawn an ni tawh a ni bawk a ni.
 
He ni hmang tur hian a bikin Mizoram Upa Pawl (MUP) General Headquaters leh Aizawl City MUP Branch zawng zawngte leh DIET, Aizawl-te sawm an ni a. Khawvel pum puia Museum hrang hrangten ni bik, mahni remchan ang theuha a ruala an hman tlan turin Inter-National Council of Museum (ICOM)-in kum 1977 khan May 18, 2019 hi International Museum Day atan a puang a, kumin-ah May 18 hi Inrinni ni (government holiday) a nih avangin May 17, 2019 hian hman a ni.