3117/2024-2025

Dated Serchhip, the 20th November, 2024: December Ni 9-13 chhunga Serchhipa neih tur International Paragliding Accuracy Championship 2024 atana inbuatsaihna chu kalpui mek niin, vawiin chawhnu khan Serchhip District Bawrhsap Pu Paul L.Khuma hovin Serchhipa sawrkar Department thenkhat aiawhte, MASA Serchhip Hqrs  hruaitute leh chanchinbumiten Zawlpui Phaia an hmunhma tur an tlawh.

International Paragliding Accuracy Championship 2024 neih tur chungchang ngaihtuah hian nimin khan Serchhip Bawrhsap Pu Paul L.Khuma hovin DC Meeting Hall-ah an thukhawm a. An thlawh chhuahna hmun tur (Take-Off point) panna kawng awmsa chu One-Way-a hman tura ruahman nise tiin meeting chuan an rel a; a panna kawng pakhat zawk hi PWD hmalaknaa lirthei kal theih tura siam nise tih niin, lirthei kalvelte lo vil turin Serchhip Traffic Police te ruat an nih bakah dan leh thupek kenkawh hna thawk turin Serchhip Police an beisei a. Ambulance Duty turin Serchhip a 42nd Assam Rifles te leh Dawngzawl a BSF Ambulance te beisei niin, Faina leh thianghlimna lam Duty turin Assam Rifles leh NSS Govt. Serchhip College te beisei nise tiin an rel a ni.

He Championship neih tur denchhen hian a tumna tur (Landing Side) Zawlpui Leilet zawlah Festival ropui taka buatsaih nise tih a ni a. Horticulture Department ten thei tui, thei leh thlai tharlam tak takte phochhuahna tur lo buatsaih se; Mizo kutchhuak thilsiam chi hrang hrang phochhuah nise an ti bawk. Fisheries Department te hmalakna  in Nghakuai inchiah siak buatsaih a ni ang a, Sangha tharlam tak tak leitur pho chhuah a ni ang. Tui thianglim in tur leh inthiarnate buatsaih turin PHE Department ruat an ni a. Free Concert ropui tak buatsaih tum niin, man chawia Baloon hmanga Vansang a thlawh kual na (Hot Air Baloon) te  ruahman tel a ni bawk.

He  Championship a tel tur hian India ramchhung mai bakah ram 13 atangin  Glyder/Pilot thahnemtak an inziak lut tawh a, an vaiin Pilot 60 chuang tel thei leh tura beisei a ni.