Vawiin hian Serchhip DC Conference Hall ah Beti Bachao Beti Padhao (BBBP) bul tumin International Women Day, 2019 hman a ni a. Hmeichhia te pawimawhna inzirtir nan leh BBBP hmalakna chungchang ASHA Workers te hnena hrilhhriatna ni atana hman niin Pi Sanchhin Chinzah, Bawrhsap chu khuallian a ni.

Pi Sangchhin Chinzah chuan, chhungkua hi khawtlang leh ram laimu ani a, chhungkaw khaikhawmtu leh enkawl chhuaktu chu nu an ni. Chuvang chuan khawtlang endawla dinchhuaktu chu nu te an ni kan ti thei ang. Kan fate kan enkawl dan hi thil te tham leh holam takah kan ngai tur a nilova, kan fate kan zirtir hian thangthar kan zirtirin, khawtlang kan zirtir nghal a ni tih kan hrereng tur a ni, a ti a. ASHA te chu nu in nau an pai atanga an hrin hnu thlenga lo kaihruaitu an nih avangin in hnathawh hi a pawimawh hle a, theih tawp chhuahin lo bei zel turin ka ngen che u a ni, tiin ASHA kalkhawm te hi a chah bawk. Khualian hian BBBP Serchhip hmalakna atanga ASHA ten an hnathawhna lama an hman tur Zozeh Bag a sem nghal a ni.

He hunah hian Pu H. Lalhruaitluanga, MCS, Nodal Officer, BBBP chuan BBBP hmalakna pakhat Serchhip District chhung Village Council tina dah tur naupiang chhinchhiahna Board, vantlang hmuh theiha tar tur (Guddhi Guddha Board) chungchang sawifiahna neiin, a enkawl dan tur te a sawifiah bawk a. Chumi hnuah Guddhi Guddha Board te hi khawtin ASHA te hnenah Dr.  Laldawngliana Sailo, CMO chuan hlanna a nei nghal a ni. Tin, Dr. Laldawngliana Sailo hian vawiin atanga India ram puma March ni 22 thlenga kalpui tur POSHAN PAKHWADA chungchang sawifiahna a nei bawk a ni.

Inkhawm kaihruaitu Pu K. Saitluanga, MIS, DIPRO chuan Serchhip-a International Women Day, 2019 hman a nih chhan sawifiahna neiin kumin Women Day thupui chu “Balance for better” a nih thu te a tarlang a. Serchhip District-a hmeichhiate dinhmun tlangpui sawiin, BBBP hmalakna hnuaia ruahmanna hrang hrang te tarlanna a nei bawk.