Nizan khan Information & Public Relations Minister Pu Lalruatkima chuan Sakawrhmuituai Group YMA Conference, Serkhan-ah a hmanpui a. Pu Lalruatkima chuan thu sawiin kan huan lo ram hnam dang laka hralh a rem lo, hemi kawngah hian sorkar a fimkhur hle a ni, a ti a. Minister chuan Pathianin ram min pek hi a neitu kan nihna angin kan humhalh tlat tur a ni, tiin a sawi a. Kan ram hi hnam dangin an luah theih lohna tur dan tha tak kan nei a, ram neituten kan kenkawh a ngai a, kan ram te hnam dang lakah kan hralh thiang lova, he mi thuah hian sorkar pawh a fimkhur hle a ni a ti a. Minister Pu Lalruatkima chuan kan ramah thlai chi hrang hrang a tha duh deuh vek tih a sawi a. Ram tha tak Pathianin min pe a, heti chunga a petu ni lova diltu kan la ni zel zawk hi kan inngaihtuah chian a tul hle a, diltu ni lova petu nih tum turin kalkhawmte a chah a ni.

I&PR Minister chuan khawvelah ram leh hnam humhalh tur nei lo tam tak an awm tawh laia ram leh hnam humhalh tur neia Zofate kan la awm chu kan vannei hle tih a sawi a. Kan thlah lokal zel turte tan kan environment kan humhalh nasat a ngai a, lui dung leh luisa venhim kawngah te tan a ngai a, nungcha leh ramngaw humhalh kawngah tan kan lak lehzual a mul hle a ni, a ti a. Minister chuan zu leh ruihhlo avangin thihna a tam hle a, hnam kalzel tur hi ngaihtuah chian a ngai ta hle a ni, a ti a. Mizoram ngeiah hnam dangin kan thawh thiam leh thawh theih ve reng thawkin hna an thawk nasa em em a, Zofate inbih chiah a hun ta hle a ni, tiin a sawi a.

Minister chuan hnam rinawm kan ni a, kan la rinawm zel em? Hnam taima kan ni a, kan la taima zel em? Hnam tlawmngai kan ni a, kan la tlawm ngai zel em? Kan nihna leh dinhmun dik tak hi inbihchiang ila, insiamthat kan ngaihna laiah insiam tha ngam ang u, tiin YMA member kalkhawmte a fuih bawk. Central YMA-a nihna pawimawh tak tak lo chelh tawh Pu Lalruatkima chuan YMA chu a kal fawr lutuk awm theia a hriat thu sawiin, YMA chu tanpui ngaite tanpuitu a nih hre rengin tanpui ngaite tanpui turin hmalam i pan zel ang u, tiin kalkhawmte a sawm bawk a ni.

He hun hi Pu K Lalthanpuia, Group Committee Member-in a kaihruai a, Group huam chhunga member boralte sunna hun hman a ni a. Pu Fabian Lalfakawma, Central YMA Finance Secretary-in Kumpuan Thupui a sawi a, Sakawrhmuituai Group YMA huamchhungah hian Branch Panga Serkhan, Nisapui, Lungmuat, Lungdai leh Sentlang te an awm a ni.