Mizoram Legislative Assembly Speaker Pu Lalrinliana Sailo chuan nimin khan a bial chhunga Khawlian khua a nghah Tuivai Group YMA Conference vawi 33-na hmanpuiin ‘H’ formula pathum “Hmar tlangdung Hmangaihna leh Hmasawnna” tih thupuia hmangin hmar thimpui zangkhaw bungbut hnan ti a an lo sawi thin chu sut en a tum thu a sawi.

Tuivai Group YMA Conference vawi 33-na Khawlian playground a “Liankhawpui Run” pandal chhunga vantlang inkhawmah bialtu MLA, Assembly Speaker ni bawk Pu Lalrinliana Sailo chuan Tuivai Group YMA member ten en an in hmuhkhawm theih avanga a lawm zia sawiin thingtlang khua a YMA member te chu corruption in a hraipuar chhungkua atanga lo kal an nilo tih a hriat avangin an zahawm ani a ti a, inthawhrimna hi a chhuanawm ani a ti bawk. Khuallian hian Ram leh Hnam humhalh tih hian kuttum lek emaw hriamhrei lek emaw lam a nilova; engtin nge Zoram nuam kan siam theih ang tih hi kan rilru put hmang tur a ni a, a bul berah chuan ei leh bar zawn kawngah Mizote hian engtin nge hma kan sawn lehzual ang tih hi ngaihtuah a ngai a ni a ti a, Khawlian khuaah vai mistiri hmuh tur an awmlo tih khawtlang hruaituten an sawi chu lawmawm a tih thu a sawi a, Mizo thalaite hian dan in a khap thil nilo ah chuan  engmah thawh hreh i nei loving u tiin  thalai kalkhawmte a fuih a, labour hna ah mizo pawisa hi nitin vaibelchhe tel Mizoram pawnah a chhuak reng a, a bial hlui Tuichangah chuan vai mistiri an awm tawh lo ani tiin hetiang hian Chalfilh bial chhungah pawh kan ti thei a ni a ti.

Khuallian chuan hnathawk lova awm hian sual leh thil thalo dang a hring thin a, mahni thawhchhuah ngei a inchawm te hi an zahawm ani tiin YMA member te chu mahni inrintawkna nen khawmpui hawsan theuh ila, kan in leh lo te a ropuilo kan ti emaw ani maithei, mahse eirukna sum a sakloh in anih avangin a zahawmin a ropui hle zawk a ni a ti. Hmar thimpui zangkhaw bungbut hnan ti a sawi hi su eng turin theihtawp a chhuah dawn tih sawiin mipuite, khawtlang leh tlawmngai pawl hruaitute bakah kohhran hote nen lungrual taka an thawhho loh chuan a harsat tur thu sawiin lungrual taka hmasawnna kawnga ke pen tura thawhho puiah a sawm nghal a ni.

Social media hman thiam a pawimawh thu pawh sawiin kan thiante emaw midang tute pawh kan mizo pui te an lo chesual deuh anih pawhin social media a thehdarh lova tha taka inchhanchhuah dan kawng dap a that thu a sawi bawk. Sawrkar tharin Hriselna leh Zirna a ngaihpawimawh tur thu leh hemi atan hian hma thar lak dan tur ruahmanna tha tak tak a siam tawh thu a sawi bawk a ni.

Tuivai Group YMA Conference vawi 33-na hi March ni 5-7, 2019 chhungin neih a ni a, nimin vantlang inkhawmah hian an member zing ami March, 2018 leh February, 2019 inkara boral mi 22 (mipa 15, hmeichhia 7) sunna hun neih a ni a, Conference chhung hian intihhlimna chi hrang hrang neiin Lengkhawm zai, Cheraw lwh Volleyball ah te intihsiakna neih ani bawk.

Tuivai Group YMA Conference vawi 33-na ah hian Pu Lalrinliana Sailo, Assembly Speaker chu khuallian niin Pu K.Lalhmuakliana, MCS chu Khual Zahawm a ni a, Central YMA hruaitute pawhin he hun hi an hmanpui a ni.

Nimin vantlang inkhawmah hian Tuivai Group YMA leh Khawlian Branch YMA ten Khuallian hi Chawimawina thuziak an hlan a, khuallian hian Conference ruai a theh sak a ni.

Assembly Speaker hian nimin tlai khan Phuaibuang tlawhin Phuaibuang YMA Library-cum-Committee Room sak tur lungphum a phum a, a haw pahin a bial chhung khaw hrang hrang Phullen, North Lungpher, Buhban, Khanpui, Khawruhlian leh Sesawng te a tlawh a, Chalfilh Vanzau Tourist Centre pawh a tlawh nghal bawk.