4733/2025-2026

Dated Aizawl, the 8th March, 2026: International Women’s Day (IWD) vawi 115-na chu Mizoram hmun hrang hrangah hman a ni a. International Women's Day Committee, February ni 19, 2026-a Social Welfare, Women and Child Development Minister Pi Lalrinpuii kaihhruaina hnuaia thukhawm chuan IWD chu March ni 8 (Pathianni)-a a tlak avangin, March ni 18 (Nilaini)-ah official function neih turin a rel a. He ni ngaihlu a hmang duhte tan mahni veng, khua leh kohhranah te a theih ang anga hmang tura inchah niin, March thla chhung hian pawl hrang hrangte chu he ni denchhen hian program hmang tura ngen an ni bawk.

Kumin International Women’s Day thupui chu GIVE TO GAIN tih a ni a - Mizo tawng chuan PEKIN LUKHAWNG A NEI tia lehlin a ni.

International Women's Day hman a nih chhan leh hmang tura infuih dan chu hengte hi a ni:

Kawng tinrenga Hmeichhiate hlawhtlinna inlawmpui a, hmasawn zel tura infuihtawnna hun neih te

Mipa leh Hmeichhiate kar zau lutuk tihzim zel - zirna kawng a ni emaw, hruaitu nihna kawng a ni emaw; hmeichhe chunga hleihlenna thleng thinte leh hnathawh inang hlawh inang chungchanga awareness neih te

Thupuiin a ken anga mahni phak tawk theuha harsa zawkte tanpui - lehkha thiam zawkte midang tana luan chhuah te, roreltute pawhin hmeichhiate a theih ang ang la chawisan kawnga hmalak te a ni.

He ni ropui tak hi ngaihlutu tam tak awmin hmun hrang hrangah hman a ni a.

Bai insuah… zonun ze mawi nena kalkawp tlat bai insuah tawnin nu tam takin he ni hi an hmang a. He induhsakna hmang hian hlim takin thenawm khawvengin he hun hi an hmang a ni. 

Mizoram Gorkha Women Association Branch hrang hrangte’n IWD denchhenin hmun hrang hrangah mi harsate thil pek, khawlaia ei leh in tur nei lote tan chaw pek leh hnatlang te an huaihawt a. Karleh chhunga program dang tih tur hmabak an la nei bawk a ni. 

Kohhran hrang hrang hman dan:

Roman Catholic - Christ the King Cathedral Kulikawn-ah chuan chawhma hun chu International Women's Day a nih angin hmeichhiate inkhawm chanvo pek an ni a. Hei bakah hian Roman Catholic Church hnuaia kohhran hrang hrangte chuan Banner te siamin he ni hi an hmang a. Director, Diocese Catholic Hmeichhe Pawl thuchah chhiar chhuah a ni a. Kawr bawkbawn rawng - Beiseina lantirtu rawng hain an inkhawm a, hun hlimawm tak an hmang. 

Salvation Army Women’s Ministries IET-te pawhin nimin lam atangin IWD denchhenin program hrang hrang an nei a. Tanpui ngaite puih mai bakah IWD Discount neih a ni a.  Vawiin inkhawmah pawh minute 10 chu Salvation Army Women Officer te tan dah niin, IWD puala thu tawi sawina hun neih a ni.  Program dang duan pawh an la nei nual bawk.

Seventh Day Adventist Hmeichhe Pawl pawhin dam lo inkhawm thei tawh lote chu IWD denchhenin an tlawh chhuak a, dam lo kanna leh tawngtaisakna te an nei bawk a ni.

Heng mai bakah hian kohhran leh pawl hrang hrangte chuan damdawi in tlawhin poor fund te an hlan a. Dam lo kan mai bakah thutthleng siam thar midang hnena hlan te an awm a ni. Elected Women Representatives-te pawhin Durtlang Hospital-ah chhun eitur an lo pe tawh bawk a ni.

IWD Committee chuan he ni leh a thil tum te a lo hlawhtlin theih nan  Mizoram mipuite theih ang zawng zawnga rilru hmun khat pua mahni hma zawn theuha Hmeichhiate tana pen chhuak turin a ngen a. Hmeichhe chawisan leh tih chak chuan inchhungkhur leh Ram changkang zawk a thlen dawn tih hre reng turin a chah a ni.

IWD 2026 hi Sorkar chuan March ni 18 ah Dawrpui MC Hall-ah a lawmna hun ropui taka buatsaih a tum bawk a ni.