Khawvel pum huapa United Nations in kum 2010 International Year of Biodiversity a puan chu Mizoram-ah pawh hmang ve turin vawiin khan I & PR Auditorium-a inkhawm buatsaihah Environment & Forests Minister Pu H. Rohluna’n a hawng.

Hawnna thuchah sawiin E & F Minister chuan Biodiversity awmzia chu thil nung tinreng tihna niin chumi zingah chuan mihringte ngei pawh an tel ve a ni a ti a.  Mihringte dam khawchhuah nan heng thil nung tinrengte hi humhalh an pawimawh zia a sawi. Kumin he kum puana thupui thlanchhuah chu ‘Thil nung tinrengte hi mihringte tan nunna an ni’ tiin Minister chuan kum tin Biodiversity Day May 22 ah hman a nih dan a tarlang a. Kuminah pawh kum hial puana nungcha leh thil nung dang humhalh turin hmalakna hrang hrang duan anih thu a sawi a. Chung zingah chuan thlalak competition te, pamphlets leh banner siam te, essay leh painting competition te, trekking te, Radio leh Television a thusawi te leh awareness campaign neihte Mizoram sorkar-in a tum dawn a ni a ti.

Biodiversity pawimawhna tarlangin Pu Rohluna chuan Mizoram sorkar-in ram ngaw humhalh kawnga hmaa lak dan tlangpui a sawi a. Mizoram-ah reserved forest Sq. Km 7007 a neih mek te, National Park 2, Tiger Reserve 1 leh Sanctuary 7 awm mekin YMA leh khawtlangten supply reserve engemaw zat an enkawl thu a sawi a. Hengte hi tih chereu lova humhalh zau zel chu thangtharte tana kan bat a ni tiin thil nung leh ramngaw humhalh kawngah mipuite tawiawmna Minister hian a sawm a ni.

Vawiin inkhawm hi PCCF & Secretary, E & F. Dr. S.S. Garbyal in a kaihruai a. Mizoram Biodiversity Board Member Secretary Pu Lalramthangan thuhma sawiin Biodiversity pawimawh zia a lem nen a tarlang a. Thilsiam nungcha humhalh kawnga pawl hrang hrang aiawh ASEP, CEP, SENVA, MIPOGRASS leh CYMA aiawh te pawhin thu tawi an sawi a. CYMA President Pu Lalchungnunga chuan hemi kawngah hian YMA te thawhhlawk loh zia leh member nuai 3 leh sing 5 chuang nei YMA te hian tunhma atang khan tan lo la sela chu tun dinhmun hi kan thleng lo tur tiin tunah erawh chuan theih tawpa sorkar tawiawm chu YMA in a ba a ni a ti.