3268/2022-2023
Aizawl, the 16th January 2023: Vawiin khan Mizoram Sawrkar Agriculture Department buatsaihin Aijal Club-ah State level Flag-off Programme on Celebration of International Year of Millet, 2023 neih a ni a. Agriculture Minister Pu C.Lalrinsanga chuan khuallian niin a hmanpui.
Pu C Lalrinsanga chuan Sawrkar Laipuiin buhtun (millet) thatzia leh tangkaizia hriaain UNO lamah rawtna a thlen angin kumin 2023 hi International Year of Millet ah puan a lo ni, a ti a. Millet-ah hian mihring taksa tana chaw tha tam tak, mihring hriselna atana pawimawh chi hrang hrang a inphum a, natna do theihna kawngah pawh nasa takin a pui thei, tih sawiin heng a thatna tam tak piah lamah ram economy nghawng pha hial khawpa sum lakluhna pawimawh a ni, a ti. Minister chuan India Sawrkarin kum tin cheng vaibelchhe tam tak lakluh nan millet hi a hmang a, Mizoram pawhin kan chhawr tangkai ve thei a ni, a ti a. Millet hi Mizoram tan thil thar a ni lo a, pi leh pute hun lai atanga chin tan tawh a ni a, ram tan ei leh bara intodelhna kawng pawimawh tak a nih avangin Mizoram pawhin hemi kawngah ke kan pen tha a tih thu Pu C.Lalrinsanga chuan a sawi. Mi tinin mawhphurhna inang lo leh pawimawh tak kan nei vek a, he kum bul kan tan mekah hian tihtakzeta hna kan thawh a, ram tan theihtawp kan chhuah a tul tiin kalkhawm te Minister chuan a fuih a ni.
India Sawrkar rawtna angin kum 2023 hi United Nations, Food and Agricultural Organization chuan International Year of Millets ah a puang a. Chumi in a tum ber chu zau zawk leh uar zawka millet thatna puanzar leh uar zawka chin a ni. Hemi bawhzui nan hian Mizoramah pawh nasa taka hmalak tum chhoh mek a ni a. Lei chhia leh hmun ro a ngam em em a, natna leh eichhetu lian tham a neih loh avangin enkawl a nuam a, a thar hma em em bawk a ni. Millets hian mihring taksa in a mamawh chaw tha tam tak a pai a, kan buh ei thin anga cholestorel chhia leh calorie a pai tam ve loh avangin zunthlum leh thisen sang nei tan chaw tha tak a ni bawk. Millets hi chi hrang hrang 12 a awm a. Chung zingah chuan Mizoin kan hriat lar chu faisa, puakzo leh buhtun a ni.
Vawiin programme, Agiculture Secretary Pu J Hmingthanmawia kaihhruaiah hian Dr. Samuel Lalliansanga, Deputy Director (P&M) chuan technical report a pe a. Cultivation of Millets and Scope of Millets cultivation tih thupui hmangin Dr Samik Chowdhury, Technical Officer, GKMS, ICAR RC NEH Reiong, Mizoram Centre, Kolasib chuan zirtirna a pe a. Pi Lalrohlupuii, Subject matter Specialist, KVK, Aizawl in Nutritional benefits of Millets tih chungchangah zirtirna a pe bawk a ni.
