Vawiin khan Higher & Technical Education Minister Pu R.Romawia, Finance Minister Pu R.Lalsawta, Information Communication Technology (ICT) Minister Pu Lal Thanzara, Parliamentary Secretary Pu TT Zothansanga leh mi pawimawh dangte’n Chief Minister’s Conference Hall-ah Mizoram khaw tin te internet chak leh man tlawm zawka thlunzawm dan tur leh chumi kaihhnawih a thlawna telephone hman theihna leh cable tv tha chi IP TV pekchhuah tel dan tur chungchang meeting pawimawh an nei.
Meeting kaihruaiin ICT Minister chuan Andhra Pradesh in hlawhtling taka an kalpui Andhra Pradesh Fiber Grid zulzuia Mizorama internet hmanga inthlunzawmna neih dan zawn a nih thu a sawi a. Bharat Net-II project chu Mizoram State in kalpui rem a tih tak avangin sawrkar laipui tanpuina leh Andhra Pradesh State Fibernet Limited (APFSL) te nena thawk hova project hlawhtling tak kalpui theih beisei a nih thu a sawi.
Andhra Pradesh Fiber Grid hlawhtling taka kalpui mek zirchiang turin May 2016 khan ICT Department official-te’n Hyderabad an pan a. India ramah he project hlawhtling taka kalpui hmasa ber tu leh awmchhun an la nih angin Mizoram state-ah hman ve theih dan a awm ang em tih an enfiah hnuah APSFL leh he project implement tu Tera Software company hotute Aizawlah lokalin Minister-te leh official dangte nen meeting hi neih a ni ta a ni.
Kumin March thla khan Andhra Pradesh chuan he project hi chhungkaw vaibelchhe 1.3 te hman theih turin a peihfel tawh a, an State pumpui tuamchhuak turin hma lak mek a ni. Mi in an duh chuan thlakhata cheng 149 chauh chawiin 15mbps a chak internet an pawt thei a, sumdawnna atana hmangtute chuan cheng 1000 chawiin 100mbps a chak internet an pawt thei thung. Triple play an tih mai Digital Cable TV (IP TV), Telephone leh High speed internet chu set top box ang tiat lek box pakhat atangin an pechhuak a. Telephone hi man chawi ngai lovin a thlawna pek chhuah a ni nghe nghe. Optical Fibre Cable (OFC) hi lei hnuai a phum lovin electric ban awmsa hmang tangkaiin electric cable thlunna hrul zelah OFC hi thlun zawm a ni a. Hei hian senso nasa taka a tih tlem bakah hna thawh hunchhung thla tam takin a pawt tawi a. He model hi entawnin Mizoram pawhin hman ve theih dan a ngaihtuah ta a ni.
Meeting-ah hian APFSL Managing Director Sambasiva Rao leh a thawhpuite bakah Tera software atangin Vice Chairman leh Managing Director ni bawk Gopichand Tummala leh a thawhpuite an tel a. Power & Electricity Secretary Rajiv Kumar Gupta, ICT Secretary Pu C.Lalhmachhuana bakah ICT leh P&E official dangte an tel a ni,
