Mizoram Police Department-a Training Branch, PHQ leh Mizoram State Commission for Women (MSCW) tangdun chuan vawiin khan ni thum chhung awh tur "Training Programme on Women Related Laws” tih thupui hmangin, PHQ Training Hall, PHQ Khatla a DIG (Trg.) Office Building-ah Mizoram hmun hrang hranga Police Officer-te tan zirtirna an buatsaih. He training hawnna hunah hian MLA Pi Vanlalawmpuii Chawngthu, Chairperson, MSCW chu khuallian niin hun a hmanpui.

Khuallian Pi Vanlalawmpuii Chawngthu chuan an pawl hmalakna anga Mizo hmeichhiate hamthatna lo sang zel chu lawmawm a tih thu leh, hmeichhiate dikna leh chanvo humhalh anih theihna tura India Dan bulpui leh Dan tesep-te zirchianna Dan hmanga hmalak anih theihna tura Mizoram Police-te leh MSCW ten thawhhona tha nei a hetiang training huaihawt a ni thei hi lawmawm a tih thu a sawi bawk.

Vawiin khan Supervisory Officer, Deputy SP chin chunglamten training an nei a. A ni hnihna, 28.06.2016 (Tuesday) hian Mizoram a Police Station leh Out Post hrang hranga Officer-in-Charge-te tan training hi neih leh niin, a ni thumna ni 29.06.2016 (Wednesday) hian Case Investigating Officer-ten zirhona an neih leh ang. Training-ah hian Senior Advocate Pu L.H. Lianhrima, Advocate T. Lalnunsiama leh Mizoram Police Officer Senior Pu Joseph Lalchhuana IPS, DIG CID/DIG (S/R) leh Pi Zairemchhungi MPS, Dy. SP Prosecution, Aizawl Court ten zirtirna an pe ang.