716/2023-2024
Aizawl the 8th June, 2023 : Mizoram Police Media Cell chuan Internet leh Online a inbumna chungchanga mipuite hnenah a hnuai ami ang hian thu a chhuah -
Khawvel changkang zelin hmasawnna tam tak a ken rualin heng hmasawnnate hian misualte tan mi bumna tur remchang a rawn keng tel ve zel bawk a. Chung zingah chuan internet (online) hmanga inbumna hi a hluar chak hle a ni. Mizoram bikah chuan Cyber-crime zingah sum leh paia inbumna hi a hluar ber a, complaint dawn zawng zawngah pawh 75% chu hetiang chi inbumna hi a ni.
Cyber Crime Police Station (CCPS) chuan internet leh online-a inbumna thleng tam takah pawisa chantu (victim) te'n an pawisa an hmuh let leh theihna'n nasa takin an lo pui tawh ṭhin a. Cyber Crime PS din a nih tirh, May 2020 aṭanga chhutin inbumna pawisa (defrauded money) ngawr ngawr pawh ₹ 24,31,455/- (cheng nuai sawmhnih pali, sing thum sang khat, za li sawm nga panga) hmuh let leh niin, a neitu dik takte hnenah pek let leh a ni tawh a ni. Hemi piah lamah hian an bungraw chah, a man pek lawk tawh bungraw thleng thei lo ang chiah hian a belhkhawmin ₹16 lakhs (cheng nuai sawmparuk) hu bungrua inhmuh let sak a ni tawh bawk a ni.
National Cybercrime Reporting Portal (NCRP) hmanga mipuite'n Mizoram Police hnena complaint an thehluh bawhzuinaah inbumna pawisa ₹11,05,018/- (cheng nuai sawmpakhat, sang nga leh sawmpariat) chu bank chi hrang hrangah khawih chet theih lohin “Hold”-a dah ani. Heng pawisa Bank-in a “Hold” te hi a Bank leh Court lama thuneitute nena ṭangkawpin a neitu dik takte'n an hmuh let theihna'n theihtawp an chhuah mek bawk a ni.
Mizoram Police chuan sum leh pai dap kawngah leh hman chhuah danah fimkhur reng turin mipuite a chah nawn leh a. Mahni mimal information pawimawh tuma hnena hrilh lo tur leh online kaihhnawih thila mahni invenna chi hrang hrang Mizoram Police Social Media handles (Instagram, Facebook etc.)-a tarlan ṭhinte zawm hram hram turin kan inngen nghal bawk a ni.
Sum leh paiah internet kaltlanga bumna i lo tawk palh a nih chuan a rang lamin National Cyber Crime Reporting Portal (NCRP) website www.cybercrime.gov.in-ah emaw NCRP Helpline number 1930-ah i report vat dawn nia.
Cyber Crime Police Station, Aizawl pawh hi a hnuai number tarlanah te hian biak pawh theih reng a ni bawk.
Mobile No : 8119935420
Landline No : 0389-2320416
Mizoram Police chu sum leh paia inbumna chi hrang hrang do turin a inpe renga, mipuite internet hman sualna laka an him theihna'n ṭan a la mek zel bawk. Kan zavaiin thawhhona ṭha nei turin ṭan la ila, kan personal information-te kan vawn him ṭhata, mahni invenna step chi hrang hrangte kan zawm ṭhat chuan cyber crime lakah kan fihlim thei ngei ang.
