Mizoram MLA inthlanpui November ni 28 a neih turah inthlanna muanawm leh felfai a awm theih nan  dan leh thupek kengkawhtu Mizoram Police chuan kawng hrang hrangin hma a la mek a. Election Commision of India (ECI) thupek angin Flying Squad Team (FST) leh Nakas (Checkpost) ten hna an thawk tan nghal a ni. Dan lova thil hrang hrang dapchhuah niin dan lova zu leh ruihhlo zuar te, silai leh pawisa chelek te a awm loh nan nasa taka beihpui thlak a ni a. Silai verification leh deposition (tun) te tih ni bawkin zu sakna leh siamna te nasa taka tih chhiat a ni. Inthlan puan a nih atangin October ni 23 thleng hian Police te chuan cheng 3,06,350 man hu rakzu (LML) 2865 litres, cheng 8630 man hu sap zu (IMFL) leh local zu siamna factory cheng 12,94,900 man hu vel zet an manin an tichhe tawh a ni. 

Heng thil thalo zawn chhuah leh venna atan hian motor/vehicle checking pawh Mizoram pumah neih mek a ni a. Heng thil thalo hrang hrang venna leh dapchhuahna neih a nih chhan chu mipui ten thlamuang tak leh felfai taka vote an thlak theihna tur a hmalakna vek a ni. Police duty leh checking titute pawh uluk taka dan ang zela che turin hrilh reng an ni bawk a. Mizoram Police chuan heng an hmalakna hrang hrang te hi nitin  Election Commission of India hnenah report an pe reng bawk a ni. Inthlanna muanawm taka neih a nih theih nan an hnathawh leh hmalaknaah tawiawm turin mipuite an ngen a ni.