Police Commemoration Day hmanna kal zelah Mizoram Police Department chuan a mamawhtute tan a thlawnin thisen an pe a. Ram leh hnam tana nunna petute hriatrengna atan Special Cover (Envelope) siamin tlangzarh a ni bawk a ni.

Ni 18.10.2018 khan Police Training School, Thenzawl staff-te chuan Police Commemoration Day pualin thisen pek (blood donation camp) an buatsaih a. Civil Hospital Aizawl leh Lunglei atangin Medical staff-ten kalchilhin mi 306 laiin thisen an pe a, Civil Hospital Aizawl tan Unit-181 leh Civil Hospital Lunglei tan Unit-125 a mamawhte hman turin thisen hi an pe a ni.

Nimin ni 22.10.2018 khan Mizoram Police Unit hrang hrangah thisen pek (blood donation camp) hi chhunzawm zel a ni a. He hun Police ten buatsaih a nih chhan ber chu mite tana inpekna leh thiltha tih chu Police te duty  pawimawh tak pakhat a nih avang leh an thian, thawhpuite ram leh hnam tana nunna hlantute hriatrengna atan a buatsaih a ni bawk a ni. Badminton Hall, PHQ, khatla Aizawl-ah thisen pek runpui buatsaih a ni a. He Blood Donation camp ah hian Aizawl a Police unit hrang hrang atangin mi 100 ten thisen pein Civil Hospital, Aizawl a staff ten thisen hi an laksak a ni. Lunglei, 2nd Bn. MAP pawhin nimin khan thisen pekna neiin Civil Hospital Lunglei staff-ten kal chilhin mi 16-in thisen an pe a. Lawngtlai DEF staff mi 4 ten District Hospital Lawngtlai tan thisen an pe bawk a ni.

Nimin vek khan Mizoram Police ten Martyr-te hriatrengna leh zahna lantir nan ‘Special Cover’ (Envelope) an siam chu Arya Mess, PHQ Aizawl-ah Pu Lalnunmawia Chuaungo, Principal Secretary, Home leh Pu Balaji Srivastava, DGP, Mizoram ten an tlangzarh a. He Special Cover/Envelope hman theih tura siamna atan hian Pu Mang Min Thang, Post Master General, Mizoram chuan 'Cancellation' a tihsak avangin Mizoram Police-te chu a chungah an lawm hle a ni. He Special Cover-ah hian Mizoram Police Logo leh thuziak - 'Police Pasalthate kan nghilh loh nan' tih Mizo, English leh Hindi-a ziak a chuang bawk a. Hei hi Police Department ten ram pumah Official Envelope/Cover atan hman thin a ni ang.