Kumin Mizoram Inthlan neih tur atana inbuatsaihna kal mekah vawiin khan ‘Orientation Meeting with Political Parties’ neih a ni a, political party hrang hrang aiawhte an kal tha hle. He meeting-ah hian tun hnaia Supreme Court thuchhuak zulzuiin Candidate-ten nomination paper ruala an theh luh thin Affidavit (Form-26) siamthat (amend) chungchang inrhilhfiahna hun hman a ni.

Political Parties Training hi Dy.CEO Pu H.Lianzela’n a kaihruai a, political party aiawha rawn kal zawng zawngte lawmna thu a sawi hmasa a. Jt.CEO Pu Zorammuana chuan thu sawiin inthlan hi sorkar ta bik a ni lova, political party ta bik pawh a ni lova, kan zavai ta a nih angin inthlan felfai neih hi mipui zawng zawng mawhphurhna a ni, a ti. Vote nei mi puitling chin tan chuan vote thlak hi an mawhphurhna (duty) pawimawh tak a ni tih hria a, vote thlak theuh turin a chah a. Political party ten an campaign-na auhlaah khawtlang emaw hnam leh hnam inkarah emaw innghirnghona tithleng thei thil engmah sawi leh uanpui lo turin a chah bawk. Tun dinhmunah chuan ECI chuan VVPAT 100 a rawn thawn mek a, chung lo thlen hunah pawh political party aiawhte nen endik vek tur a ni dawn tih a sawi a; EVM khawl hnuaia rubber inphah pawh ECI chuan a pan deuh tiin a thuah belhna tur rubber bushing a rawn thawn mek tih a sawi bawk.

Vawiin Political Parties Orientation Meeting-ah hian Resource Persons - 1). Pu H.Lalhmingthanga, SLMT, Dy. Secretary, SAD/DP&AR chuan ‘Supreme Court Judgement on the Petition regarding people with criminal antecedents contesting elections’ leh ‘Amendments in Form-26 (Format of Affidavit by Candidates)’ chungchang a hrilhfiah a, 2). Pi H.Vanlalruatfeli, Programmer, Election Dept. chuan ‘IT Applications for conduct of Elections’ thupui hmangin kumin inthlana internet hman ngaihna thil hrang hrang a hrilhfiah bawk a ni.

Govt. of India, Ministry of Law & Justice chuan Writ Petiiton (C) No.784 of 2015 (Lok Prahari Vs. Union of India & Others) leh Writ Petiition (Civil) No.536 of 2011 (Public Interest Foundtaion & Ors. Vs. Union of India & Anr.) chungchanga Supreme Court thuchhuak zulzuiin, Candidate-ten nomination paper ruala an theh luh thin Affidavit (Form-26) chu a siamtha (amend) a (vide Notification No.H.11019(4)2018-Leg.II, dtd.10.10.2018). Chuvangin Candidate zawng zawngin he ammended Form-26 hi hman tawh tur a ni. Supreme Court thuchhuak bawhzui hian Election Commission of India chuan uluk taka a ngaihtuah hnuah Houses of Parliament leh Houses of State Legislature inthlana Candidates thubuai neite (convict cases leh pending cases, FIR pawh huam vekin) leh Political party-te zawm atan kaihhruainate a siam a ni.