Kum 1999 atanga mahnia lemziak chi hrang hrang pho chhuaka mahnia Painting Exibition lo neih tawh thin Pu Laltanpuia Aizawl Art Gallery chuan vawiin khan Tanpuia 8th Solo Painting Exhibition a buatsaih chu Pu Lalduhthlana IFS ( Retd),Chief Information Commissioner chuan Aizawl Art Gallery,MUP Building 2nd Basement,Upper Khatla ah a hawng.

Hetiang programme mawl tak anga lang, changtlung leh belhchian dawl tak hlu tak bawk si Pu Tanpuia leh a thawhpui te’n an buatsaihah lawmthu sawiin khuallian Pu Lalduhthlana chuan an thiltih engkimah an ti mai mai lo tih a hriat in a lang a,Painting leh Photography lam chu a tuipui leh mit latu ber ni mahse a hlawhtlinpui tam ve theih loh lam anih avangin hetiang pho chhuah leh a timi te a hmuh chuan a lawmpuiin a hlimpui em em thu a sawi . Thlalak leh lemziak te tarchhuaka pholan a nih hian a tuam mawitu a frame te hian kawngro an su in an pawimawh hle bawk a,lemziakah te phei chuan vawikhat thai in awmzia a nei thui hle a ni tiin khawvel ram hrang hranga lemziak thiamte chanchin leh an lemziah dan te ngaihnawm taka sawiin Pu Lalduhthlana chuan Mizo lemziakthiam te kuthnu leh sulhnu hi an duai lova,ram dang mi te mit pawh a la hle tih hriat a ni a,tunah hetiang lam zirna sikul te a awm chho zel te hi a lawmawm in Mizo thalai te tan khawvel hriata inpho chhuahna remchang tak a inhawng chho mek a ni a ti. Khuallian chuan heng painting te hralh chhuahna tur leh pho chhuahna atana tha ngaihtuahna a neih te sawiin bawhzui tur tulah pawh a tih v e theih anih chuan puih a inhuam thu a sawi a.Tluang taka show chu neih anih theih nan duhsakna nen Exibition chu a hawng ani.

Pi Lallianpuii,MIS,Joint Director,I & PR, State Nodal Officer MADS pawhin thu sawiin mahni painting vawi riat lai phochhuaktu Pu Tanpuia thawhrimna leh inpekna a ropuiin a chhuanawm a,vawiin programme hian nasa zawk rah chhuah la neih ngei a beisei tlat ani a ti a.Mizoramah Art Development hi a kal thui ve tawh hle a,Artist hrang hrang, Society hrang hrang ami te thawhrim na chuan tunah hian nasa taka hmasawn a nih chhoh dan leh I & PR Department pawhin Nodal Department anih anga hma a lo lak pui dan a sawi a. Tunah pawh hian Mizoram Youth Commission bultumin Jowahar Bhavan ,New Delhi ah kumin November 14th -19th chhung hian neih tum anih thu a sawi .

Pu HK Jerry Ramliana,President,MADS kaihhruai vawiin programme ah hian 8th Solo Painting Exibition buatsaihtu Pu Laltanpuia chuan vawiin ah Water Colour Painting chi hrang 32 lai a pho chhuah theih avang leh thiamthil nei mi bik leh tuichilh nei hlawhtling tak tak te’n an rawn telpui theih a vanga lawmthu sawiin Quantity aia Quality a ngaihpawimawh zawk avanga vawiin ah pawh Water Colour Painting bik chauh a thlur bing thu a sawi a. Mizo painter te kut hnu hi a theuneu bik hauh lova,hmanrua ah pawh tunlai hmasawnna chhawrtu ni zelin an paper, rawng hman leh thil dangah pawh International Standard vek ani a ti a. Amahah chona thatak a awm vang leh duhsaktu fuihtu te avanga ram pawn pela State dangah te pawh a kuthnu phochhuak tura hma a lak chhoh zel dan te a sawi a ni.

Tanpuia 8th Solo Painting Exibition hian vawiin 23rd October atanga 30th October,2018 thleng a awh dawn a. Zing dar 10 atanga tlai lam 5:30 thleng hawn thin a ni anga. Hetih chhung hian lei duh leh en duh tan hun hawn a niin a thlawna kal theih a ni.