Kumin MLA General Election neih zawh taka vote tlate chu December Ni 11, 2018 hian chhiar ani dawn a. Hemi ni a vote chhiar tura ruat Counting Supervisor leh Counting Assistant-te pualin vawiin chawhnu khan DC Conference Hall, Champhaiah training buatsaih a ni. 

Training-ah hian Pi Ethel Rothangpuii PD, DRDA Champhai & RO for 21-Lengteng (ST) A/C, 23-Champhai North (ST) A/C; Pu Lalremruata Kullai, Election Officer leh Pi Laldinfeli, SDC Champhaite chuan vote tla chhiar tur Counting Official-te hriat tur hrang hrangte an sawifiah a. Postal Ballot Paper chhiar dan leh ziahluh dante, EVM endikna, hawnna leh vote tla chhiar dante an zirtir a. VVPAT Paper Slip chhiar dante bakah Form 17 C hmanga vote tlate enfiah dante zirtirna pek a ni bawk a. Heng bakah hian zawhna leh chhanna hunte neih niin, inthlan hmasa lama vote chhiar kalpui dante tawn hriat nei ten sawilangin  zirho a ni bawk.

Champhai District-a vote chhiar ni a duty tur hian Counting Micro Observer, Counting Supervisor leh Counting Assistant a tan mi 45 theuh ruat an ni a. 21-Lengteng (ST) A/C biala Vote tla chu Vote tla chhiarna Dawhkan 8 hmangin Observers’ Room, DC office-ah chhiar a ni anga, round 5 chhunga chhiar zawh hman tum a ni a. 22-Tuichang (ST) A/C a vote tlate chu District Panchayat Resource Centre (DPRC) Auditorium-ah chhiar tur a ni a, Vote tla chhiarna Dawhkan 7 awmin round 6 chhunga chhiar zawh hman tum a ni.

23-Champhai North (ST) A/C a vote tlate chu General Establishment, DC Office-ah chiar a ni ve thung dawn a, Vote tla chhiarna Dawhkan 8 awmin,  round 5 chhunga chhiar zawh hman tum a ni a. 24-Champhai South (ST) A/C biala vote tlate chu District Emergency Operating Centre (DEOC), DC Office-ah Vote tla chhiarna Dawhkan 7 hmangin  round 5 chhunga chhiar zawh hman tura ruahman a ni a. 25-East Tuipui (ST) A/C a vote tlate chu DPRC Conference Hall-ah Vote tla chhiarna Dawhkan 7 hmanga chhiar tur niin,  round 6 chhunga chhiar zawh hman tum a ni a. Assembly Constituency tinah hian Postal Ballot Paper leh VVPAT Paper Slip chhiarna tur Dawhkan 1 ve ve a awm zel dawn a ni.

Champhai District chunga Assembly Constituency 5 awmah Polling Sation 137 a awm a, EVM a vote tlate chhiarna tur Dawhkan 27, Postal Ballot chhiarna 5 leh VVPAT chhiarna tur 5 a awm dawn a, vote tla zawng zawng chhiar zo tur hian round 27 a ngai dawn a ni.