Mizoram Legislative Assembly inthlan 2013 lo awm tur atana tihtur pawimawh tih theih chin tihfel a ni tawhin, inthlang tura inpeih thawkhat a ni ta.

Kum 2013 MLA General Election lo awm tur atan Champhai District Election Officer Pu Lalthangpuia Sailo IAS hovin inbuatsaihna ngawrh taka kalpui zel a ni a, tunah hian thil pawimawh tih tur hrang hrangte pawh tihfel thawkhat a ni tawh a, vote thlak theih tura inpeih a ni ta

Champhai District a Election Officer te chuan inthlan atana buatsaihna zawh tawh chin leh hmalak zel dan tur chi hrang hrangte, vote thlak pawimawh zia leh thil tul dangte sawihovin Election Talk Show Champhai DC Conference Hall ah neih a ni a, mipui ten inthlan chungchagna an hriat tur leh vote thlak dan turte sawiho a ni. Pi K. Laldingliani Secretary Media Certification & Monitoring Committee kaihhruaina a inthlan chanchin sawihona ah hian Champhai District Election Officer, Champhai DC ni bawk, Pu Lalthangpuia Sailo chuan, mitinin Vote thlak hi kan mawhphurhna a ni tih hria a Vote thlak vek turin mipuite a ngen a, India rama awm, Democracy hnuaia awm kan nih angin a mi cheng te chuan Vote thlak hi kan tihmakmawh a ni a ti. Champhai District Election Officer Pu Lalthangpuia Sailo chuan, Vote thlak vek tura mipuite a sawm bakah, candidate te zinga an duhzawng mi an awm ngang lo anih pawhin NOTA (None Of The Above) ah tal hmet tur pawha vote thlak hram turin mipui a ngen bawk a ni.

He hunah hian Addl. DC Pu Zoengsanga pawhin thusawiin, vote thlak velo te hi sorkar ah pawh an tel velova, chuvangin sawiselna kawngah pawh sawitur an nei velo a ni tih pawh sawilang bawkin, Electoral Roll a inthunah thahnem kan ngaihem em ang hian hmanna tur dik tak vote thlak ah thahnem kan ngai ve tur a ni a ti.

Pu R. Vanrengpuia Election Officer pawhin thu sawi bawkin, Election lo awm tura team hrang hrang chanvo insem dan hrang hrangte a sawi a, anmawhphurhna leh an chanvo hrang hrangte a tarlang bawk a ni. Pu Alan Lalthanzara, MCS, SDC Champhai chuan, Systematic Voters Education and Electoral Participation chungchang pawh tarlangin, vote thlak hi khua leh tui tha mawhphurhna a nih thu a sawi bawk a, Pi Rochuangkimi Khenglawt leh Pu Zoremthara Ralte BDO te pawhin election chungchanga thil pawimawh, mipuite hriattur pawimawh tak tak an sawi bakah training an pek dan report an pe bawk a ni.