Kan hma lawka Mizoram inthlanpui neih tur atana inbuatsaihna chu Lawngtlai District chhungah tluang taka kal pui zel a ni a, Polling Party zawng zawngten training an nei zo fel a, venhimna lama thawktu te pawhin an awmna hmun tur theuhah awm fel tawh in hna hrang hrangte chak taka kalpui mek zel a ni bawk.

Vawiin hian 38-Lawngtlai East Assembly biala duty tur Polling Party ten Government Region Higher Secondary School ah training thawhthumna an zo fela, ti hian Lawngtlai District huam chhunga Assembly bial pathuma polling party zawng zawng ten training thawh thumna nei zo vek tawhin an awmna hmun tur theuh pan thei turin an inpeih fel ta a, heng Polling Party mi leh saten vote an thlak ve na tura buatsaih Postal Ballot hmanga DC Conference Hall a hawn pawh vawiin tlai lam hian khar fel ani tawh dawn bawka, tun thlenga vote tla hi chiang tak hriat theih a la ni lo a ni.

Venhimna lam thawk turin Assam State Armed Police, Company pathum te pawhin an awmna tur theuh an thut fel tawh a, 1st Battalion MAP atanga sipai 67, 2nd Battalion MAP atanga sipai 185, 3rd Battalion atanga sipai 8 leh 1st leh 5th Indian Reserve Battalion atanga sipai 38 lokal te pawhin an awm hmun tur theuh vawiin atang hian an thleng fela, an hna thawh tur theuhte an thawk tan nghal a ni. An ni bakah hian District chhunga awm Mizoram Police Unarmed Branch sipai engemaw zat an lo awm sa tawh bawk a ni.

Heng venhimna lam mawh phurtute zinga engmaw zat hi Election Duty team hrang hrangah sem darhin inthlanna puan a nih atang khan ngawrh takin an hnate an lo thawk tan tawh bawk. Lawngtlai District huam chhungah hian Police Station panga awmin Out Post pahnih a awm meka, heng Station leh Outpost te hi hmun kilkhawr tak tak, duh hun huna tlawhpawh mai theihloh ah te an awm hlawm avangin hun engemaw chen kal ta atang khan an inbuatsaih nasa hle a ni.

Hetih lai hian inthlanna dan bawhchhia an awm leh awmloh veng tura din team hrang hrangte pawhin ngawrh takin an hnate an thawk renga, hmun kilkhawr tak tak tlawh ngai an nih hlawm avangin duh anga chaka hnathawh a harsat deuh thu team hruaitu thenkhat hnen atanga dawn a ni a, tun dinhmunah dan bawhchhiatna lian tham sawi tur a la awm lo niin District Level Complaint Monitoring Cell Assistant Leader Pu K. Saitluanga, DIPRO hnen atanga dawn ani bawk.

Election Commision lam atanga local Observer pali, General Observer pathumte leh Expenditure Observer te pawhin an hna chanpualte ngawrh takin an en reng a, General Observer te pawh anmahni bial chan theuhvah a thawh hnih nan an zin kual hlawm a, chutiang bawkin Expenditure Observer pawhin hmun hrang hrang tlawh kualin dan pela thiltih a awm leh awmloh a vil reng bawk.

Lawngtlai District huam chhunga vote thlak thei mipuiten kokim taka vote an thlak theih nana inzirtirna pawh ngawrh taka kalpui zel a ni a, hian mipuiten vote an thlak theuh theih nana inzirtirna video clip (Advertisement Clip) District Information and Public Relations Officer hova siam chu zanin atang hian Lawngtlai a Cable TV Channel pali ah tih chhuah tan tura peih fel a ni bawk.