Kumin kumtawp lama Mizoram Legislative Assembly inthlanpui neihna tur atan vawiin atang khan Election kaihhnawih training hrang hrang neih tan a ni a, Lunglei DC Pu V.Sapchhunga-in Training Programme hi a hawng a ni. Election Commission of India chuan kumdanga la awm ngai lo, kaihhruaina thar hrang hrang a siam thu sawiin Pu V.Sapchhunga chuan Lunglei District huamchhungah inthlanna felfai tak neih theih turin sorkar officials te chu mahni chanpual theuh ah hnathawh uluk a pawimawh a ni, a ti.

Training programme zulzuiin vawiin khan Media Certification & Monitoring Committee (MCMC) chuan training an nei hmasa ber a. Training-ah hian Pu H.Lalhmingthanga, SDO(S) & SLMT-in ‘Roles & Duties of MCMC’ chungchang a sawifiah a, Lunglei SO Pu K.Vanlalthiana-in ‘Paid News’ chungchang a sawifiah bawk. Dr.Andrew H.Vanlaldika kaihhruaina hnuaiah heng thupui pahnih chungchang zawhna leh chhanna hun bakah sawizauna hun neih zui a ni bawk.

Mizoram inthlanpui atana ruat Model Code Officers, ROs & AROs bakah Police Officers of Inspectors/DSP Ranks te tan karleh September ni 16, 17 leh 19, 2013 khian training neih zui a ni dawn a ni.