Lunglei Venglai-a DIG (Southern Range) leh S.P. Office awmna building sak zawh thar chu vawiin khan Home Minister Pu R.Lalzirliana’n a hawng.

Hawnna inkhawm DIG (Southern Range) Pu L.H.Shanliana kaihhruaiah Khuallian Pu R.Lalzirliana chuan thu sawiin Lunglei chu Mizoramah Kristianna bultantu a nih avangin hmasawnna namen lo a hmu zel a, hun reiloteah Zoram kawtchhuah leh khawvar eng lo chhuahna tur a ni, a ti. Sorkarin police-te hamthatna hrang hrang a ngaihtuah zingah Lunglei-a DIG (Southern range) post dah te, Police Inspector-te pawh Gazetted Post-ah hlankai an nih bakah tunlai mila ralthuam, hmanrua leh building an mamawh angte pawh phuhruk sak zel an ni bawk a, hengte hi mipuite rawngbawl nan leh boruak muanawm neih theihna tur a ni ti hre reng turin a chah. Mizoram Police te chu fakin Home Minister chuan thilsual titute chhuichhuahna kawngah leh dan leh thupek kenkawh lamah entawntlak an ni tiin mipuiten an chungah rinna an nghah theihna turin rinawm leh taima taka thawk zel turin a duhsakna a hlan a ni.

Vawiina hawn tak DIG (SR) leh SP Office awmna building hi chhawng 4-a sang a ni a, Cheng nuai 177.94 hmanga sak zawhfel a ni. Tun dinhmunah Lunglei District-ah police 388 an awm a, police station 6 leh police outpost 2 a awm bawk a ni.