Ni thum awh Serchhip District-a Sawrkar Laipuiin thingtlang hmasawnna tur leh mirethei te dawm kanna tur atana ruahmanna a siam chi hrang hrang mipuite a hrilhhriatna, Bharat Nirman Public Information Campaign chu vawiin khan New Serchhip YMA Hall-ah khar a ni a; he hun hi Education Minister Pu Lalsawta’n khuallian niin  a hmanpui.

Khuallian Pu Lalsawta chuan UPA Sawrkar hian mipuite hamthatna tur ruahmanna hrang hrang siama hna a thawh piah lamah hian; hna a thawh sak mipui ten an tana sawrkarin hna a thawhsak hi hrechiang lehzualin belchiang lehzual se a duh a, hma an sawn pui dan te leh hmasawn lehzelna tur te pawh hriat belh anih theih nan mipuite ngei hmaichhana dawr a an ngaihdan lakna hun siam tha a tih vang leh langtlang taka engkim kalpui a duh avangin Bharat Nirman Public Information Campaign hi a duangchhuak a ni a ti a, Sawrkar chu mipuite siam a ni a, ‘Sawrkar hnathawk’ tih tawngkam pawh hi a dikhlel deuh a, mipuite thawhlawm thawhkhawm atanga Sawrkar sum hi lo awm anih vangin ‘Mipuite Chhiahhlawh (Public servant)’ tih hi kan hming put dan tur leh kan nihna kan hriat dan tur a ni a ti a; chhiahhlawh atana min hmangtu mipuite hian in chhiahhlawh, Sawrkarin hlawh a pek zawng zawngte hi min hriatchian loh a nangmahni vanga ei leh in kan ni tih in hriatchian loh chuan in chhiahhlawhte hian awmdan kan thiam lo mai ang tih a hlauhawm a ni a ti bawk.

Khuallian chuan India ramah chuan Indirect Tax/Excise Duty kan pe nasa a, hei hi hrethiam lovin Mizote phei chuan chhiah kan pe lo emaw kan ti mai thin a, anihna takah chuan thil kan lei apiangin chhiah tam tak kan lo pe teuh zawk thin a, hei vang hian chhiah tlingkhawm atanga din sawrkar leh Sawrkar atanga hlawh la reng reng te hi mipuite chawm kan ni a, hei hi kan hriatfuh tawk loh thin avangin kan thikthu pawh a chhe tawk lo thin a ni tiin mipuite chu Sawrkar kalphung leh hnathawh dan ahte, hmalak dan ah te dilchhut lehzual a, dik tak leh fel taka hna thawh anih theih nan thahnemngai lehzual turin a chah a ni.

Vawiina Bharat Nirman Campaign PIC neih hi mipuite leh zirlaiten an hlut hle a, Hall a leng lo an kalkhawm a ni. PIC neihna hmunah hian Sawrkar Laipuiin thingtlang hmasawnna a ruahman kalpuitu Line Department hrang hrang 15 ten an hmalakna tarlanna an nei a, heng hi Khuallian hian a enchhuak vek a ni.

Vawiinah vek hian Bharat Nirman Public Information Campaign Satellite Venue Keitum ah neih a ni a; zing dar 9:00 ah Keitum Kawn atanga VC House thleng Govt. H/S Keitum zirlai naupangten PIC RALLY an nei a, he PIC Rally anneih zawh hian VC House ah lutkhawmin PIC Co-Nodal Officer Pu MC Lianmawian PIC awmzia leh neih chhan kimchang te sawiin hun a hmang a, hemi hnu hian NRHM kaltlangin a thlawna inentirna (Free Clinic) Health Camp, Presbyterian English School, Keitum ah neih nghal niin Serchhip Hospital a thawktute leh Mobile Medical Units Team(MMU) ten a thlawnin damlote an en bakah; a mamawhte hnenah a thlawnin Damdawi an sem a, he Health Camp ah Keitum khaw chhung leh a chhehvel atangin damlo natna chi hrang hrang nei mi 300 an inentir a ni.

Bharat Nirman Public Information Campaign (PIC) kharna inkhawm vawiina neih hi PIC Core Committee Chairman Pu Mangjangam Touthang, IIS chuan a kaihruai a, PIC buatsaih anih chhan leh buatsaih dan kalphungte sawifiahna hun hman anih bakah zaithiam hrang hrang zaiin, I&B Ministry hnuaia Song and Drama Division ten hnam lam hmuhnawm tak tak an entir bawk a ni.

Chawhnu lamah mipuite hnena sawrkar hmalakna hrilfiahna hun “Technical Session" hman a ni a, hei hi MJA Serchhip District member ten kaihhruaiin Technical Session hi hun hnih ah then a ni a, hunkhatna hi Pu Thuamliana, Jt. Editor, Ramlai Arsi Daily Newspaper  in a kaihruaia he hunah hian Jawaharlal Nehru National Urban Renewal Mission (JNNURM), Rashtriya Krishi Vikas Yojana(RKKVY)  etc., chungchangte zirho niin; Technical Session hunhnihna Pu R. Lalmuansanga, Secretary, MJA, serchhip kaihhruaiah hian Right To Information Act (RTI) 2005, Rural Telephony bakah Thalaite hamthatna tura ruahmanna hrang hrang leh hnathawh theih chi hrang hrang inzirtir a ni bawk. Technical Session ah hian topic hrang hrang te hi a concerned Department official ten an sawifiah a, mipuiten an hriat duh an zawh te chu an chhan sak thin a ni.

Serchhip District-a Bharat Nirman Public Information Campaign hi September ni 11-13, 2013 chhunga neih niin a hmunpui berah New serchhip hman a ni a, Satellite Venue atan Khawlailung leh Keitum hman a ni bawk. Ruahman lawk ang chuan Press Information Bureau (PIB) Bharat Nirman Public Information Campaign hi tun thla tawp lam hian Lawngtlaiah neih leh tum a ni.