Vawiin khan PHE Minister Pu S. Hiato chuan Tlungvel PHE Sub-Divisional Office a hawng.

Pu S.Hiato chuan Tlungvel khuain kawng hrang hrangah hmasawnna chhinchhiahtlak tak tak a hmuh thu sawiin, khawtlang mipuite leh hruaitute tanrualna fakawm a tih thu a sawi a. "Sorkar chuan kan engineer-ten an thiamna an hmanchhuah theihnan an kutte tichakin, Sorkar laipuia scheme hrang hrangte chak takin a bawhzuia, Mizoram khawpui lian zawng zawngah project lian tak tak kalpui mek a ni", a ti a, PHE Department hmalaknate chu chhuanawm a tih thu sawiin, a thawktute chu mipui tana ding an ni tih hre reng turin a chah bawk. Khuallian hi Tlungvel Village Council chuan taimakna leh tihtakzetna entirnan, Tlungvel pa kutchhuak 'Chempui' an hlan a ni.

Khualzahawm bialtu MLA Pu K.Lianzuala chuan Tlungvel khaw mipuiten nghakhlel taka an lo thlir thin a taka a lo thleng ta chu a lawmpui thu sawiin, khawtlang mipuite leh hruaitute tanrualna chuan rah tha a chhuah zel a beisei thu a sawi a. Sorkar department hmalaknate tawiawm tura chahin, neitu thinlung pu chunga khawtlang hmanrua leh hmunhmate humhalh chu hmasawnna atana kawng pawimawh tak a nih thu a sawi bawk.

Hawnna inkhawm hi Pu R. Lalfanliana, Engineer-in-Chief, PHE Department chuan a kaihruaia, Rev.P.C. Vanlalhruaia'n hunserh hmangin, Pu V. Lalmuana, Tlungvel VCP chuan inlawmna thu a sawi a. Pu P.C. Lalkristiana, Gen.Secy. , Tlungvel Welfare Gen. Hqrs, Aizawl hnen atangin thusawi tawi ngaihthlak niin, Er. Lalmuanzova, Chief Engineer, PHED Zone-I chuan lawmthu sawiin hun a khar a ni.

PHE Sub-Divisional Office hawn thar hian Tlungvel leh a chhehvel khua 22 a huam dawn a, SDO pakhat leh J.E. pathum telin, thawktu hi an vaiin 11 tura ruahman niin, Pu Ronghaka, SDO chuan a thutchilh dawn a ni.