United Sports Association of Mizoram (USAM)-in sports lama mi hmingthate chawimawina USAM Sports Award 2013 a siam chu zanin khan I&PR Auditorium-ah sem a ni a. Sports Minister Pu Zodintluanga chu khuallian a ni.

Pu Zodintluanga chuan kum reilote chhunga infiamna lama Mizo thalaite hmasawn chakzia chu ropui tiin Sports Association hrang hrangte leh sorkar thawhhona rah a ni, a ti. Mizoram sorkar chuan infiammite intuaihriamna turin infrastructure tha, infiamna hmanrua mamawh chi hrang hrang, stadium thate, training hall leh khelmual thate siam tura hma a lak dan a tarlang a. Republic Venga Taekwondo Hall sakna tur te, Zemabawk-a Judo Hall sakna turte leh Powerlifting Hall sakna tur bakah Indoor Stadium panga sakna tur pawh sorkar laipui Planning Commission chuan a sanction fel tawh thu USAM Sports Award semna inkhawmah Sports Minister chuan a puang a. Sorkarin a lo tiam tawh angin infiammite enkawltu tur Sports Doctor pawhin sorkarah hna a zawm fel tawh thu a sawi bawk. Pu Zodintluanga chuan USAM-in infiammite hmasawn zelna tur ngaihtuaha Sports Award an sem chu lawmawm a tih thu sawiin hei hian nasa takin infiammite tan phurna leh chona duhawm a siamsak zel a beisei thu a sawi a ni.

USAM hi Sports Association hrang hrang 32  intelkhawmin an din niin lawmman hi category 10-ah hlan a ni a. Chungte chu - Sports Promoter of the Year- Dr. Lalmalsawma; Specially-abled Award - PC Kapthianga, Shooter; Best Sports Coverage Award - LPS Vision; Sports Writer of the Year - Brian Lalnunhlima, Mizo Aw; Coach of the Year - Vulthavunga, Boxing; Lifetime Achievement - C.Lalremsanga, Archery; Most Promising Player of the Year (Girls) - Lalenkawli, Boxing; Most Promising Player of the Year (Boys) - Lalrinpuia, Table Tennis; Sports Person of the Year (Women) - Vanlalduati, Boxing leh Sports Person of the Year (Men) - Lalrindika Ralte, Football te an ni.