Mizorama a vawikhatna atan a hman tur, Bal Bhavan Society hmalakna pakhat, Mobile Library chu vawiin khan Parliamentary Secretary Pu Lal Thanzara'n Sihphir-ah a hawng.
Pu Lal Thanzara chuan naupangten pawisa tam tak sen ngailoin a thlawna lehkhabu tha tak tak an chhiar thei tawh tur chu lawmawm tiin, Bal Bhavan Society thawktute chu an hmalaknaah lawmthu a hrilh a. Lehkhabu chhiar taihmak hi a pawimawhzia naupangte hian an hre tawh lo fova. Hriatna tizautu a nih mai bakah nun thalo laka venghimtu a ni thei a ni, a ti. Naupangte hi kan ram ro hlu leh ram hruaitu nghahfak an nih angin, lehkha zirna mai bakah an talent inthup haichhuah hi kan tih makmawh a ni, Pu Lal Thanzara chuan a ti bawk.
Cheng nuai 5.44 sen na Mobile Library hi Social Welfare Department kaltlanga Sorkar laipui tanpuina hmanga buatsaih a ni a. Mizorama naupangten an lehkhabu chhiar duh zawng leh milem hmuhnawm tak tak bakah infiamna chenin an khua leh venga chhiar theih turin lirthei hmanga chhawp hnaih sak an ni dawn a ni.
Library hawnna inkhawm hi Bal Bhavan Secretary Pu H. Vanlalrawna’n a kaihruai a, Sihphir Local Council President leh Sihphir Branch YMA President ten thu an sawi bawk. Bal Bhavan naupangten lemchan, Cheraw leh zai in mipui an awi a ni.
