Tukin zing dar 7:00 khan Saikhumphai-ah Pu Lalrinliana Sailo, Minister of Trade & Commerce chuan India leh Myanmar insumdawn tawnna tura Border Trade Centre lungphum a phum.

Lungphun phumna inkhawmah hian Minister chuan thu sawiin helai hmun hi thil duhawm lo tak lo thlenna hmun a ni tawh a, mahse tunah chuan Pathian hminga theihnghilh vek tawh turin mipuite chu sawmin thil duhawm zawk India leh Myanmar insumdawn tawnna hmunpui pakhat Border Trade Centre bul tanna hawn a ni ta chu lawmawm a tih thu a sawi a. He border trade siam nan hian Central sorkar chuan Cheng Vaibelchhe 8 a remti tawh a, tunah hian Cheng Nuai 50 chu bul lo tan nan ruahman mek a ni a, Land Development atan nuai 20, a hmunhma en felna tur (transit camp) atan Cheng nuai 15 leh ram hungna atan Cheng nuai 15 hman a nih tur thu sawiin helai hmunah hian In tam tak a lo la ding ang a, a hmasa berah kohhran nghet lo din tur leh sumdawnna thianghlim lo lam chia inrawlh lo turin helai chheh vela chengte chu a chah nghal a ni.

Hemi hnu hian Minister hian Saikhumphai khawtlang hruaitu leh Vaphai VCP-te chu mipui hmaah ko chhuakin “Remna Chibai” a inbuk tir a, minister chuan vawiin atang hian Saikhumphai leh Vaphai khuate chu inrem takin i awm tawh ang u a ti a ni.

Saikhumphai chairman Pu T.Lalchawivela chuan he hunah hian thu sawiin silpouline hnuaia kan awm lai pawhin sorkarin min ngaihsaknaah kan lawm takmeuh a, Saikhumphai khawi lai pawh hi Border Trade Centre atan hian kan phal a, Saikhumphai mipuite chuan compensation engmah claim kan tum lo a ni a ti. Vaphai VCP Pu Saithansiama pawhin thu sawiin Saikhumphai nen hun engemawchen inrem lohna kan neih thin chu kan minister-in remna min siam hi kan lawm a, Pathian-in a tum tawh chu mihringin kan tibuai thei lo a, tluang tak leh rem taka kan kal chhoh ngei ka beisei, a ti.

He hunah hian Pu B.Lalhmingthanga, Secretary, Trade & Commerce pawhin thu sawiin Border Trade Centre lo awm theihna hi Minister Pu Lalrinliana Sailo remhriatna, inpumpekna leh thawhrimna avang liau liau a nih thu a sawi a, helai hmun hi kan pi leh pute, Mizoram an rawn luh dawn khan helai Saikhumphai, Vaphai kaiah hian rawn tawlh lutin thlang an tla zel niin a lang a ti a, Border Trade Centre hi Saikhumphai-Vaphai, leh Mizoram mipuite tan chauh ni lovin India am pum tan pawh thil hlu leh tangkai, ramdangte nena kan insumdawn tawnna chhuahka pawimawh tak a la ni dawn a, chumi hre reng chuan kan minister chuan helai hmuna Trade Centre din a nih theih nan hian theihtawp chhuahin hma a la a ni, a ti bawk.

Champhai DC Pu Lalthangpuia Sailo chuan lawmthu sawina hun hmangin Saikhumphai hal hlimah a rilru a hah thu leh remna avanga hma latu department-te an fakawm thu sawiin remna hnuaia sorkar thu leh hla ngaichanga inrem taka awm chho zel turin a chah a, remna hnuaiah hian chak taka hmasawnna a kal a beisei thu a sawi bawk.

Inkhawm zawhah hian Minister Pu Lalrinliana Sailo hian ‘Remna Bung’ phunin Saikhumphai-ah hian ‘Remna Tukthuan’ an kilho nghal a ni.

Border Trade hawnna inkhawm hi Vaphai khuaah pawh Primary School compound-ah neih chhunzawm nghal a ni a. He hunah hian Minister Pu Lalrinliana Sailo chuan thu sawiin Mizo Two hi tumah kan awm lo a, Zo hnahthlak zawng zawngte hi chhulkhat kual kan ni tih hi i pawm ang u a ti a, Pathian faa vuah tlaka remna siam thei zel turin mipuite chu a chah a, Border Trade neih theihna tura Trade & Commerce-a thawktute thahnemngaihna leh khaw mipuite inpeknaah lawmthu a sawi bawk.

Vaphai khuaah hian tlaiah ran lu kimin ruai an kilho lehnghal a ni.

Minister hian Champhai a panna kawngah Sesih, Dilkawn leh Leithum-ah te chawlin PHC hmun leh hmate a tlawh bakah khawtlang hruaituten an mamawh an lo thlente a ngaihthlak sak bawk a, minister hi Champhai zan riakin Inrinni-ah Zokhawthar a tlawhin chawhnu lamah Aizawl panin a haw thla nghal a ni.