Vawiin khan Pu R. Lalzirliana, Home Minister chuan Multipurpose Centre, Dawrpui Vengah Multi-Level Parking, Community Centre and Office Complex sakna tur lungphum a phum.
Pu R. Lalzirliana chuan, Sorkarin mipuite mamawhna hria a, hmalam hun thui tak thlir chunga a hmalaknate a taka a hlawhtlinna kan hmu leh ta chu lawmawm a tih thu a sawi a. Ram tana rotling hmunhma tha neih a pawimawhzia sawiin, thangtharte hmakhua ngaichunga ram leilung hausakna haichhuah kawngah pawh theihtawp chhuah mek zel a nih thu a sawi bawk. Aizawl khawpuiin kan mamawh em em, puipunna hmun leh lirthei dahna sak tur hi mipuite leh sorkar department-te bakah, pawl hrang hrang te pawhin tangkai taka an chhawr ngei a beisei thu a sawi bawk. Ram hmasawnna tithuanawp thei, diklo taka compensation dil thin te chu kalsan a hun tawh thu sawiin, Sorkar leh khawtlang mipuite tanrualna chuan ram tan rah tha a chhuah ngei tur thu a sawi bawk.
Bialtu MLA, Pu Lalsawta Education Minister chuan Sorkar leh Dawrpui khawtlang thawhhona tha tak avanga he Building sak theih tura lungphum phum a ni ta chu lawmawm a tih thu leh, ni chhinchhiahtlak tak a nih thu a sawi a. Dawrpui khawtlangin mi rethei, chanhaite leh Aizawl khaw pawna mite tana an rawngbawlna chhunzawm zelna kawngah he building hi tangkai taka hman a nih ngei a rin thu a sawi a, Mizoram mipui zawng zawngin kan intawm tur, kawng hrang hranga tangkai tak tur a nih ngei a beisei thu a sawi bawk.
He huna thusawitu dang, Pu J. H. Rothuama, Revenue Minister chuan Dawrpui Veng chu Civil Hospital thuthmun a nih anga chhiatniah an tlawmngaihna leh inhuamnate fakawm a tih thu sawiin, he an khawtlang inpekna chhawm nun zelna atan leh, ram changkannain a ken tel, lirthei pung chak zel chhawk zangkhaina atana he Complex sak a ni tur hi lawmawm a tih thu a sawi bawk.
He inkhawm kaihruaitu, Sports & Youth Services Minister Pu Zodintluanga chuan inlawmna thu sawiin, Dawrpui veng mai nilo, Mizoram mipuite hman tangkai tur sak a ni dawn ta hi lawmawm a tih thu a sawi a. Pu K. Lalsawmvela, Chief Engineer, Buildings, PWD chuan Technical Report pein, Pu Chhawnkima Pachuau, President, YMA Dawrpui Branch hnen atangin thusawi ngaihthlak a ni bawk. Pu R. Lalvena IAS, Secretary, Sports & Youth Services chuan lawmthu sawiin hun a khar a ni.
He Complex sakna atan hian Ministry of Development for the North East Region atangin cheng vaibelchhe 12.9826 hmuh a ni a, Restricted Tender kaltlangin a sak hna thawk tur hian M/S Mechfab Engineering Industries Pvt. Ltd., Guwahati chu thlan fel tawh niin, thla 22 chhunga zo fel tura ruahman a ni. A building hi Block hnih, Block I & II tura duan niin, Block-I hi sak hmasak tura ruahman a ni a, Block-I bulthut zau zawng tur hi 792 sq.m. a ni a, basement neiin chhawng nga tur niin, staircase hmun hnihah dah a nih dawn bakah lift pawh dah tel tura ruahman a ni bawk. A chung berah thutna 670 awm theihna tur, Auditorium awmin, a hnuai chiahah hian Office leh Banquet Hall a awm anga, chhawng thum dangah hian Parking, lirthei 58 dah theihna tur leh Ruang nghahna room a awm bawk ang. Block-II hian basement a nei lo thung a, chhawng hnih chungah hian Basketball Court leh gallery te dah tura ruahman niin, Block-II hi sak tel a nih hunah chuan he complex-ah hian lirthei 120 chuang dah theih tura ruahman a ni.
He hunah hian Pu Lalrobiaka, MLA, Chairman ZIDCO; Pu R. Lalrinawma MLA, Chairman Law Commission ; Pu C. T. Zakhuma, Chairman AMC bakah, PWD leh Sports & Youth Services Department hotute leh Dawrpui khawtlang hruaitute an tel a ni.
