Mizoram sorkar New Land Use Project entawnin Arunachal Pradesh chuan Integrated socio-economic programme kalpui a tum a. Hemi atana NLUP kalphung rawn zir chiang tura Arunachal Chief Minister, Pu Nabam Tuki rawn tirh, State Land Use Board Director, Pu Joram Puppa chuan vawiin khan NLUP Implementing Board Chairman Pu R.Selthuama leh Marketing Cell hotute hmuin NIB conference hall-ah line department te nen NLUP chungchanga inkawm hona an nei.

Arunachal Pradesh chuan Mizoram sorkar-in NLUP a kalpui mek dan an lo thlirin entawn tlak an ti a. NLUP chu an ram mamawh mil hmasawnna programme nia an hriat thu leh hetiang project kalpui ve tur hian Planning Commission leh central sorkar thuneitu dangte pawh an lo dawr mek tawh a ni tih Pu Joram-a chuan meeting ah hian a sawi a. NLUP project kalphung leh a kalpui dan tur chungchanga anmahni finchhuah turinArunachal Pradesh sorkar chuan Mizoram sorkar chu tanpui turin a rawn ngen a ni, a ti.

NLUP chungchanga Arunachal Pradesh in Mizoram sorkar tanpuina a rawn ngen chungchang ah hian Mizoram sorkar pawh a inhawng hle a. Chief Minister in NIB hotute chu a theih anga hma lo lakpui tura a tih angin NIB hotute chuan project buatsaihna chungchanga thil kalpui dan leh hriat tur pawimawh dang te chu Pu Joram hi an hrilhfiah a. Line department hrang hrang ten project kalpuina kawnga zawhna a neih te chu an hrilhfiah bawk a. NIB hotute chuan Pu Joram hnenah hian Arunachal state pui turin englai pawhin an inpeih tih hrilhin a tul angin hma an lakpui zel dawn tih an sawi a. Hlawhtling taka Arunachal Pradesh-in NLUP project ang hi a kalpui theihna turin duhsakna an hlan bawk a ni.