Vawiin September 16, 2013 hian Lawngtlai District Superintendent of Police Conference Hall-ah kumin MLA inthlanna lo awm tura police-te hna chanvo hrang hrangte zirhona neih a ni a, chawhnu lamah khawtlang hruaitute leh tlawmngai pawlte nen inkawmhona an nei bawk.

Kan hma lawka Assembly inthlanpui lo awm tura inbuatsaih nan Lawngtlai District huam chhunga Police Out Post hrang hrang Officer Incharge leh Lawngtlai SP Office a Police Officer ten Election Commission of India in an hnathawh tura a ruatte in zirtirna hun an hmang a. He hun ah hian Pu B.K Singh IPS, Lawnglai SP chuan hetianga inzirtirna tha tak lo neih hmasak hi Election Commission of India duh dan a nih thu sawiin Election atana Police lam ten hmalakna tur hrang hrang an neih te chu a tarlang a; kalkhawmte hi chipchiar takin a hrilhfiah a ni. Kan hnate tha taka hlenchhuah a nih theih nan leh inthlanna felfai tak a awm theih nan kan tih turte chu chiang taka kan hriat hmasak a ngai a ni ti in, Superintendent of Police hian Peoples Represention Act leh Indian Penal Code te a zirtir a, Police Officer kalkhawm te hian an mahni Post theuh ah an Staff te an zirtir ve leh chhawng dawn a ni.

Training zawh hnu hian SP hian Lawngtlai District chhung a khawtlang hruaitu, Tlawmngai pawl leh District Council aiawhte sawm in, kumin inthlanpui lo awm tura dan leh thupek kenkawh kawnga thawh puiah a sawm a. Mipui sawrkar tha taka tundin a nih theih nana Election Commission of India in tih tur a sawi hrang hrangte hrilhfiahin, a bik takin dan leh thupek kenkawh kawngah tlawmngai pawlte thawhpuina sawrkarin a mamawh zia a hrilh a ni. He huna kalkhawm khawtlang hruaitute leh tlawmngai pawlte nen hian thawhho dan tur leh hma lak dan tur nia an hriatte sawi hovin inpawh tlang takin an inkawm a ni.