Vawiin khan Coordination Committee on Traffic Management chu Transport Minister Pu PC Zoram Sangliana hovin a pisaah an thukhawm.

Aizawl khawpuiah lirthei a ni telin a pung a, kawngpui erawh zauh hleihtheih a nih tawh loh avangin khawpui tawt lutuk a ziaawm theih dan tur kawng hrang hrang Traffic Management Coordination Committee chuan a dap a. Vawiin meeting-ah hian rawtna engemawzat a lut a. Chung zingah chuan Traffic tibuai thei kawngpui dunga Electric leh Telephone ban senghawi chungchangte; khawpui chhung kawngpui thenkhat pawng leh lek (lei) zual deuh bik lai siamrem leh tihzauh deuh dante; kawngpui lun laia hawker leh anmahni dawrtuten kawngpui an tihchep chungchangte; kawngpui chep laia traffic tibuai thei Automobile workshop tam tak awmin harsatna a siam dante; kawngpui dunga lirthei zan riaka dahin traffic jam a siamfo thute; private driving school uluk zawka enkawl leh endik a tul thute; driving license leh lirthei fitness pek danah fimkhur lehzual a tul thu te; mipui kalna footpath leh railing siam that a tul thute bakah Aizawl khawpui lun lai hmun thenkhatah a remchan dan anga motor tam tak hun theihna tur multilevel parking siam a tul thute sawiho a ni a. Heng rawtna hrang hrangte hi uluk taka ngaihtuah niin Traffic Management Coordination Committee chuan sorkar thuneitute hnena a tul dan anga thlen nise an ti a ni.

Meeting-ah hian Transport Secretary Pu C Lalhmachhuana leh mi pawimawh dangte an tel.