Tunhnaia chanchinbu leh media thenkhat a lo lang, PWD hnuaia Contract hnathawktu thenkhat, abikin M/s Sunshine Overseas Pvt. Ltd., Upper Republic, Aizawl, leh M/s ABCI infrastructure Pvt. Ltd. Club Road Silchar-te kan Chief Minister, (PWD Minister ni bawk) leh a nau Pu Lal Thanzara Parliamentary Secretary i/c PWJD etc.- ten duh sak bik vanga PWD hnuaia hna engemaw zat pe anga tarlan a ni a. Hei hi thil hriat chian tawk loh vang niin a lang. Thil awmdan dik tak chu heng Firm(contractor) pahnih ten tuna an hna thawh lai mekte hi rampum huap a Tender(National Competitive Bidding) kaltlanga pek vek an ni a. Tin, pek an nih theihna chhan pawh heng hna chhangtu zinga tling leh chhang hniam bertu an nih avang chauhva heng an hnathawh mekte hi pek an ni zawk. Hetiang a nih avang hian Chief Minister emaw Parliamentary Secretary i/c PWD etc. in an duhsak vanga heng hnate hi pek a nih loh mai bakah heng hna pek naah hian Chief Minister leh Parliamentary Secretary i/c PWD-te hian inhnamhnawihna an neilo.
A nihna takah chuan hun engemaw ti atang tawh khan hna lian chhang thei leh thawkthei tur (capable and qualified contractor) Mizoram a thawk duh contractor an tlem a. Chuvangin PWD-in tender a tih chhuah thenkhat phei chu chhangtu hmuh loh changte pawh a awm fo thin. Hetiang a nih avang hian hna thenkhat tender phei chu chhangtu hmuh loh hlauh vangin Mizorama hnathawk duh contractor awm chhunte hi PWD hotute hian chhang tura thlem chang pawh an nei fo a ni.
Tunhnai deuh atang phei kha chuan tender tam zawk hi e-tendering vek an nih bakah a funding agency-te Standard Bidding Document duansa anga 2-envelope system-a tender thin a ni. Hetiang tender system-ah hian duhsak zawng thlan ngawt theih dan a awm lova a chhangtu tling zinga chhang hniam bertu pek mai thin a ni. Hetiang a nih avang hian Chief Minister emaw Parliamentary Secretary leh Minister dang tan pawh duhsak zawng pek theih a ni lo.
