2784/2023-2024

Aizawl, the 13th November, 2023: General Election to the Mizoram Legislative Assembly, 2023 hnuaia Media Cell, CEO Office kaltlanga ni tin chhuak Chanchinbute tana buatsaih, mipui hnena Election chungchang leh vote thlak tura inzirtirna lam hawi kalpui tha inelna, October ni 26, 2023 atanga November ni 6, 2023 chhunga neiha tel Chanchinbu thehluhte chu vawiin chawhnu dar 2:00 khan Media Centre, CEO Office-ah Addl. CEO Pu H.Lianzela, Nodal Officer, Media Cell kaihhruaiin endik a ni a. He hunah hian Media Cell, CEO Office hmalaknate thlirlet a ni bawk.

Addl. CEO Pu H.Lianzela, Nodal Officer, Media Cell chuan chuan Election-ah Media tel lova chet lak a harsat thu sawiin, Election puan atanga vawiin ni thlenga Media mite tawiawmna fakawm a tih thu a sawi a. Election chungchanga hriattur pawimawh tak takte mipui hnena an puang chhuak thin chuan awmze thui tak a nei a ni, a ti a. Media-te nena felfai zawka thawhho a nih theih nan CEO Office leh District Hqrs-ah ECI kaihhruaina siam angin Media Cell din a nih thu sawiin, thawhhona leh tanrualna tha tak hnuaia hmalak a ni thin chu lawmawm a tih thu a sawi a. District Media Cell-te bakah MCMC Member-te tawiawmna fakawm a tih thu a sawi bawk a. Media Cell hnuaia member tinte chungah leh hmunhma hman hawh tirtu ICT Department chungah lawmthu a sawi bawk a. Inthlan kaihhnawih hmalaknate zawhfel a la nih loh avangin thawhhona tha tak chhawmnun zel a tul hle a ni, a ti a. Hmalaknate ziak leh thlalaka dah zel a nih theih nan documentation lam ngai pawimawh turin member-te a chah nghal bawk.

Vawiin thutkhawmah Election chungchang mipui zirtir kawnga inelna huanga tel Chanchinbu 8, CEO Office-a thehluhte chu tehfung hrang hrang siam hmanga ngun taka endik a ni a. Endikna result hi November ni 15, 2023 (Nilaini) hian puan chhuah tum a ni a, lawmman inhlan hun tur erawh inhrilhhriat leh tur a ni ang. He inelna huanga pakhatna hian pawisafai Rs. 30,000/-, pahnihnain Rs 20,000/- leh pathumnain Rs 10,000/- an dawng dawn a. Media Cell, CEO Office chuan hmalakna ngaipawimawha inelna huanga tel Chanchinbu theihtawp chhuahtute fakawm a ti a. Inthlanna dik, felfai leh langtlang neih a nih theih nana an hmalaknate ropui a ti takzet a ni.

He hunah hian Media Cell hmalaknate thlirlet niin hmachhawpte pawh sawiho a ni a. Member kalkhawmte atangin Media Cell hnuaia hmalak tawh dan leh pawimawh ni a hriatte ngaihthlak a ni bawk.

Vawiin Media Cell, CEO Office thutkhawmah hian Dy. CEO-II Pu Henry C.Lalrawnkima, Member Secretary, Media Cell bakah Member dangte an tel kim a ni.