1206/2023-2024

Khawzawl, 20th July 2023: Mizoram Legislative Assembly General Election neih tura inpuahchahna kal zelah vawiin khan BNRGSK Hall, Khawzawlah Inter-Department Meeting neih a ni a.  Tluang taka inthlan neih a nih theih nan inthlan kalphung inhrilhhriatna leh sawihona hun hman a ni.

Khawzawl Bawrhsap, District Election Officer (DEO) ni bawk Pu K. Lalrohlua chuan thu sawiin Khawzawl District-in a vawi khatna atan inthlan a hmachhawn dawn a ni, a ti a. He hun pawimawh takah hian kalkhawmte chu an mawhphurhna theuh tha taka hlenchhuak tur leh sawrkar kut ke an nih anga rinawm taka an hna thawk turin a sawm a.  Kum 2018 Inthlanpuiah Mizoram puma vote tla chawhrual aiin Tuichang biala  vote tla a tlem thu DEO hian tarlangin, nimin lama Khawzawl tlawhtu Chief Electoral Officer ( CEO) Pu Madhup Vyas pawhin vote tla tha lo hi  ngaimawh hle thu a sawi a. Kumin MLA General Election-a vote tam zawk a tlak theih nan uar zawka inzirtirna kalpui a tul thu a sawi bawk.

Khawzawl SDO (Sadar) Pu Vabeimozachhi Chozah pawhin thu sawiin Democracy ropuina chu mitin ten an hriat reng a tul, a ti a. Inthlanna dik leh thianghlim a awm theih nan Election Commission of India ( ECI) in dan a zam te dik leh tha tak a zawm zel a pawimawh a ni, a ti bawk.

He hunah hian Pu Timothy R. Lalhmangaiha chuan presentation pein MLA General Election-a Election Team hrang hrang - Election Expenditure Monitoring Team, Static Surveillance Team, Video Surveillance Team, Video Viewing Team, Accounting Team, Complaint Monitoring Control Room and Call Center, EVM Management Team, Postal Ballot Team, Vehicle Management Team, Material Management and Procurement Team, Media Certification and Monitoring Team, Despatch and Receiving Team, Media Cell, Social Media Cell, Sector Officer leh Polling Party-te mawhphurhna sawifiahna hun a hmang a ni.

Meeting hi Khawzawl Additional DC Pu Lalfakzuala chuan a kaihruai a.  Khawzawla office panga - DC Office, District Rural Development Office, District Urban Development Office, Block Development Office, Settlement Office te an tel.