278/2024-2025 

Naktuk April ni 19, 2024-a Lok Sabha MP Inthlanpui neih tura Mizoram chhung Polling Station hrang hranga duty tur Polling Official-te chu an duty na tur hmun panin an chhuak kim ta.

Aizawl District-a Assembly Segment 12 a duty tur Polling Party-te chu an duty na tur hmun panin vawiin chawhnu khan an chhuak fel, AMC Sports Complex, Bawngkawn leh Tlangnuam Field & Futsal Playground atangin Polling Party-te hi an chhuak a, District Election Officer Pi Nazuk Kumar, IAS leh General Observer Dr. Nipun Vinayak, IAS ten an enpui a ni. Aizawl District-ah hian Polling Station 321 awmin mi 1600 an fehchhuak a, Team 400 an inthenin an zinga Team 65 hi hmeichhe hlang awmna a ni.

Lunglei District hnuaia Polling Station 163 a Lok Sabha Inthlanpuia duty tur polling party te chuan vawiin chawhnu khan Saikuti Hall, Lunglei an chhuahsan fel a. Nimin (17.04.2024) khan P-2 Polling Station (polling station ni khata thlen harsa) 13 a duty tur ten an duty na tur hmun an lo pan tawh bawk a ni. Lunglei District-ah hian Assembly Segment 6 awmin Polling station 176 (Auxilliary Polling Station 4 telin) a awm a, Lunglei District pumpuiah inthlan buaipui tura official fehchhuak hi mi 641 an ni.

Champhai District chhunga Assembly Segment 3 hnuaia Polling Station 84 a duty tur Polling party-te pawh Champhai DC Complex atangin an chhuak kim tawh a, Assembly Segment 3 – Champhai North, Champhai South leh East Tuipuiah hian mi 336 duty in an fehchhuak a ni.

Siaha District chhunga Assembly Segment 2 - Saiha leh Palak hnuaia Polling Station 81 a duty tur Polling party-te pawh Siaha DC Complex atangin an chhuak kim tawh a, polling personnel fehchhuak hi mi 324 niin, Hmeichhe hlangin an vil tur Polling Station 4 a awm a ni.

Kolasib District chhunga Polling Station 89-a duty tur Polling Party-te chuan Deputy Commissioner pisa tualzawl a ‘Dispatch Centre’ atangin an duty-na tur hmun theuh panin an chhuak kim tawh a ni.

Kolasib District-a Polling Station hrang hranga duty tur hian thlaveng tur te nen mi 452 ruat niin, Assembly Segment 3 – Tuirial, Kolasib leh Serlui a awm a ni.

Serchhip District chhung Assembly Segment pathum – Serchhip, Tuikum leh Hrangturzo-a duty tur Polling Party te pawh vawiin khan District Election Office tualzawl atangin an duty na hmun tur panin an chhuak fel. Serchhip District chhungah hian Polling Station 88 awmin inthlan buatsaih tura fehchhuak hi mi 352 an ni.

Lawngtlai District chhunga P-1 (inthlan hma chiah ni a thlen ngai) polling station 65 a duty tur polling party-te chuan vawiin khan Government Lawngtlai College atangin an duty-na tur hmun an pan.

Nimin khan polling station hla zual 116 (Tuichawng - 70; Lawngtlai West - 32 & Lawngtlai East - 14)-a inthlan buaipui tur polling party-te chuan an duty-na tur hmun an thleng fel tawh a. Heti hian Lok Sabha Inthlanpui, 2024-a Lawngtlai District chhunga polling station 181-a inthlan buaipui tur polling personnel mi  724 te chu an duty-na tur hmun panin an chhuak kim ta a ni.

Mamit District chhung Assembly Segment pathum – Hachhek, Dampa leh Mamit-a duty tur Polling Party 72 te pawh vawiin khan District Election Office tualzawl atangin an duty na hmun tur panin an chhuak fel. Mamit District chhungah hian Polling Station 121 awmin inthlan buatsaih tura fehchhuak hi mi 484 an ni.

Nimin khan P-2 Polling Station 49 a duty tur Polling Official 196 te chuan an duty na tur panin Dispatch Centre hi an lo chhuahsan tawh a ni.

Khawzawl District chhunga Assembly Segment awmchhun 22-Tuichanga duty tur Polling Party te chuan vawiin khan DC Office tualzawl atangin an duty-na hmun tur an pan a. Tuichang bialah hian Polling Station 28 a awm a, inthlan buaipui tura official fehchhuak hi mi 112 an ni.

Hnahthial District-a inthlan buaipuitu (Polling Party) te pawh Dispatch centre, DC office tual zawl atangin an chhuak fel tawh a. Hnahthial District huam chhungah hian South Tuipui Assembly Segment chiah awmin Polling Station 27 a awm a, inthlan buaipui tura official ruatte hi mi 108 an ni. 

Saitual District-a Polling Station hrang hranga duty tur mi 320 chu Saitual DC pisa kawtzawl atangin an duty na tur hmun theuh panin an chhuak fel tawh a.  Saitual District ah hian Polling Station 80 awmin, Assembly segment pathum - Chalhfilh, Tawi leh  Lengteng te an ni. Critical Polling station 5 leh All Women Managed Polling Station 4 a awm a, theme based unique polling station “water and ecological conservation” thupui hmangin Saitual Primary School-II chu chei a ni bawk.

Mizoramah hian kum 1998 MP Inthlanpui atang khan 70% aia tam vote a la tla lo a. MP Inthlanpui 2019 ah khan 63.13% chauh a tla a. Chutih laiin National average chu 67.1% a ni thung a ni. Kum 2024 ah hian India rama Vote tlak thatna ber State zinga kan tel ve ngei theih nan mahni hna tul kalsana phur taka Vote thlak theuh turin vote nei zawng zawngte Election Department chuan a ngen a ni.