277/2024-2025 

Champhai, the 18th April, 2024: Vawiin chawhnu dar 3:00 khan Pu James Lalrinchhana, District Election Officer, Champhai District chuan Champhai District chhunga Chanchinbumite a Office Chamber-ah kawmin Lok Sabha Inthlanpui, 2024 atana hmalaknate hrilhfiahin, inthlang tura Champhai District a inpeih tawh thu a sawi.

District Election Officer Pu James Lalrinchhana chuan mipuite tana hriattur pawimawh puanzar a nih theih nan media-te nena a khat tawka hmalaknate inhrilhhriat chu thil pawimawh tak a ni, a ti a. Champhai District media te'n inthlan kaihhnawih inbuatsaihna leh hriattur pawimawh, inzirtirna thenga mipui hnena thahnemngai taka an puangzar thin chu lawmawm a tih thu a sawi a. Thuchhuah leh inkaihhruaina siamte tha taka an zawm chu entawntlak tiin, hmalam hun zel atan pawh thawhhona tha tak vawnnun zel a beisei thu a sawi a. DEO chuan district mipuite chu vote thlak ngaipawimawh turin a chah a, vote nei tura thahnem kan ngai ang bawkin vote thlak turin thahnemngai taka kan penchhuah a tul a ni, a ti bawk.

Thawhhona tha tak hnuaiah Champhai District-ah inthlanna muanawm, felfai, langtlang leh entawntlak tak neih a lo nih fo tawh thin thu sawiin, Lok Sabha Inthlanpui, 2024 pawh tluang taka neih a nih leh ngei theih nan District mipui zawng zawngte tawiawmna a ngen nawn leh a. Democracy lungthu pawimawh tak media-te tawiawmna leh finchhuahna a bik takin a ngen a. Inpuahchahna pawhin a vawrtawp thlengin engkim peihfel a ni tiin, Champhai District chu Lok Sabha Inthlanpuí, 2024 hmachhawn turin a inpeih tawh a ni, a ti bawk.

Press Meet-a tarlan a nih dan chuan Lok Sabha Inthlanpui, 2024 atan hian Champhai District-ah voter 57454 awmin heng zingah hian kum 85 chunglam 350 leh Vohbik (PwD) voter 296 an awm a. Polling Station 84 awmin hmanraw mamawh ang bituk Assured Minimum Facilities a awm vek a. SVEEP kaltlangin inzirtirna hrang hrang neih a ni a, hmeichhe hlang duty-na Pink Polling Station 9, Assembly Segment tinah pathum theuh siam a ni a, chungte chu:

A) 23-Champhai North (ST) AS:

i) 23/24 -Kahrawt I PS

ii) 23/21 - Keifangtlang PS

iii) 23/27 -IB Veng PS

B) 24-Champhai South (ST) AS:

i) 24/2 - Chhungte PS

ii) 24/18 - Ruantlang PS

iii) 24/19 -Ruantlang Mualveng PS 

C) 25-East Tuipui (ST) AS: 

i) 25/12 -Leithum PS

ii) 25/19 -Dungtlang PS 

iii) 25/20-Khawbung I PS

Heng bakah hian thupui thlanbik nei (Theme based PS) Assembly Segment tin ah 1 theuh siam a ni a, chungte chu:

i) 23-Champhai North (ST) AS ah 23/24 - Kahrawt I chu pipu sulhnu Historical based theme-a chei a ni.

ii) 24-Champhai South (ST) AS ah 24/18 Ruantlang Polling Station chu Man Made based theme-a chei a ni

iii) 25-East Tuipui (ST) AS-ah 25/20-Khawbung I Polling Station chu Nature based theme-a chei a ni.

Champhai District-ah Home Voting dilna pawmsak mi 134 an awm a, heng zinga 133 te hi kum 85 chunglam niin Vohbik (PwD) 1 a awm a, ni 12, 13 leh 15 April, 2024-ahte Mobile Polling Team 16 ten an chenna inah an pan chilh a, an zinga 129 ten vote an thlak a, 1 boral tawhin midang 4 te erawh an awm remchanglo a ni. Inthlannaa duty Election Official, mahni duty-na hmuna vote thlak dil Election Duty Certificate pekchhuah mi 724 an awm a, heng mite hian inthlanniah an duty-na hmunah vote an thlak dawn a ni.

Champhai District Police bakah State Police hmun dang atangin duty turin Champhai an lo thleng a. CAPF company 1 leh platoon 1 an awm bawk. Ramri dep duty na hmun Nakas hmun 5 ah siam a ni a, ramri dep khuate atangin Silai 329 tun fel tawh a ni. Election-a candidate-te sum hman dan ngun taka vil a ni a. Inthlan puanni March ni 16, 2024 atanga vawiin April ni 18, 2024 thleng drugs & narcotics, zu leh dan lova thil tih man zat tlingkhawm hlut zawng chu Rs. 7,34,30,015/- a tling tawh a ni.

EVM/VVPAT khawlte inthlan nana hman theih turin buatsaih fel vek tawh niin inthlan-a duty tur ten an hman tur an kengchhuak tawh a, EVM/VVPAT reserve-te chu Sector Officer-ten inthlanniah thlaveng atan an mawmawh tawk an kengchhuak bawk a, heng bakah hian District Headquarters Strong Room-ah mamawh thulha hman tur thlaveng engemawzat kawl a ni. Tun dinhmuna Champhai District-a EVM khawl neih dan chu BU-137, CU-149 leh VVPAT-141 a ni. Model Code of Conduct bawhchhiatna complain dawn a awm lo a. Lok Sabha Inthlanpui, 2024 inthlanni (Poll Day) atan District Control Room chu DC Conference Hall-ah siam leh a ni a, Polling Station 50 (60%) te webcasting tih a ni dawn bawk a ni.

He hunah hian DEO Champhai hi Pu Vineet Kumar, SP; Pu K. Zorammuana, Dy. DEO; Pu Lalrinawma, Nodal Officer, EMM; Pu Benjamin Zalawma Ralte, EO leh Nodal Officer dangte'n an tawiawm a ni.